Бу күннэргэ Дьокуускай куорат Муус пааркатыгар аан дойдуга аан бастаан соҕотох тэрээһин — оскуола оҕолорун икки ардыларыгар муус уонна хаар оҥоһуктарга күрэс буола турар.
Бу туһунан тэрийэр кэмитиэт бэрэстэбиитэлэ Петр Слепцов билиһиннэрдэ.
— «Биһиги — Хоту дойду оҕолоробут» диэн Михаил Максимов аатынан муус уонна хаар оҥоһугар оҕолорго аналлаах куонкурус быйыл ахсыс төгүлүн ыытыллар. Киин куорат таһымыттан саҕалаан, хаста да статуһа уларыйан, быйыл норуоттар икки ардыларынааҕы күрэс буола турар. Бу — оскуола оҕолоругар анаммыт бастакы тэрээһин. Тэрийээччилэринэн киин куорат култуураҕа уонна духуобунай сайдыыга управлениета, «Хотугу дьүкээбил» Муус паарка ХЭУо уонна «Л.А. Ким аатынан Оҕо художественнай оскуолата» эбии үөрэхтээһин тэрилтэтэ.
Быйылгы тэрээһин «Аан дойду оҕолоро доҕордоһоллор» диэн ааттанан Арассыыйа норуоттарын сомоҕолоһууларын сылыгар ананна. Муус оҥоһукка икки күн, хаарга балтараа күн күрэхтэһэллэр.
Куонкуруска биэрбит эскиистэринэн 15 хамаанда күрэхтэһэ сылдьар. Ол курдук, Дьокуускай куораттан 7 хамаанда, Тааттаттан — икки, Мэҥэ Хаҥалас, Хаҥалас улууһуттан итиэннэ Новосибирскайтан, Хабаровскайтан, Красноярскайтан, Кытай Народнай өрөспүүбүлүкэтин бэрэстэбиитэллэрэ кэлэн кытта сылдьаллар.
Сарсын эбиэккэ диэри оҕолор хаар оҥоһукка үлэлэрин түмүктүөхтэрэ.