Бу күннэргэ Дьокуускай куоракка өрөспүүбүлүкэ араас улуустарыттан 25 бастыҥ иитээччи кэлэн “Сыл иитээччитэ-2026” күөн күрэскэ кытынна. Дьэ, уонна муҥутуур кыайыылаах, биэс бастыҥ иитээччи аатын бүгүн Орджоникидзе болуоссатын үрдүк сыанатыгар иһитиннэрдилэр.
Иитээччилэр түөрт күн устата бэйэлэрин билиһиннэрииттэн саҕалаан, куорат уһуйааннарыгар кырачааннарга дьарыктары ыытыыга, маастар-кылааска, эспиэртэр уустук ыйытыыларыгар тиийэ хас даҕаны түһүмэхтээх тургутууну аастылар.
Үөрэх уонна билим миниистирин бастакы солбуйааччы Ньургун Павлов:
— Быйылгы сыл дойду үрдүнэн үөрэх эйгэтигэр Оскуола иннинээҕи үөрэхтээһин сылынан биллэриллибит буолан, уһуйаан үлэһиттэригэр ордук ураты сыл. Үөрэх уонна билим министиэристибэтэ сыл бастакы дэкээдэтин оскуола иннинээҕи үөрэхтээһиҥҥэ анаабыта. Бэс ыйын саҥатыгар Бүтүн Арассыыйатааҕы кэмпириэнсийэ, “Сыл иитээччитэ-2026” күөн күрэс эрэгийиэннээҕи түһүмэҕэ буолла. Элбэх быыстапка, сэминээр, уһуйааннары стратегическай өртүнэн сайыннарыыга аналлаах мунньахтар ыытылыннылар. Бу дэкээдэни кэрэ бырааһынньыгынан түмүктүүбүт – биһиги ытыктабыллаах педагогтарбыт идэҕэ сатабылларын маастарыстыбатынан. Бу түөрт күн устата иитээччилэр улахан уопуту атастаһан, идэҕэ сатабылларыгар биир үктэл өрө таҕыстылар. Эһиги күннээҕи сыраҕыт, өрөспүүбүлүкэ оҕолоругар тапталгыт иһин махтанабыт, — диэн кыттааччылары эҕэрдэлээтэ, оҕону иитиигэ сүҥкэн кылааттарын иһин үрдүк наҕараадалары туттарда.
Педагогика билимин дуоктара, “Сыл иитээччитэ” федеральнай күөн күрэс эспиэрэ, “Обруч” сурунаал кылаабынай эрэдээктэрин солбуйааччы, РФ үөрэхтээһинин эйгэтигэр Судаарыстыбаннай бириэмийэ лауреата Наталья Рыжова: “Эһиги өрөспүүбүлүкэҕит уһуйааннарын, педагогтарын 2003 сылтан билэбин, ыкса ситимнээхтик үлэлэһэбит. Дойду үрдүнэн элбэх уһуйааҥҥа сылдьыбытым итиэннэ Саха Өрөспүүбүлүкэтин оскуола иннинээҕи үөрэхтээһинэ чахчы уратытын бэлиэтиибин. Туох уратылааҕый? Уһуйаан эйгэтин аныгы сүүрээнин туһанаҕыт уонна ону кытта бэйэҕит култуураҕытын сатабыллаахтык дьүөрэлиигит. Ону тэрээһиннэргэ, оҕолор кыттыыларыгар, уһуйааннары киэргэтиигэ, саҥа технологияларга, сыыппараҕа көрөбүт” – диэн эттэ. Экологическай үөрэхтээһиҥҥэ кылааттарын иһин таһаарыылаах үлэлээх педагогтарга махтал суруктары туттарда.
“Сыл иитээччитэ-2026” күөн күрэс лауреаттара:
- Кириллов Сергей Валерьевич, Өлүөхүмэ улууһа
- Васильева Туйаара Геннадьевна, Сунтаар улууһа
- Болдысова Рыгзыма Цыреновна, Хаҥалас улууһа
- Шеремет Ирина Вячеславовна, Томпо улууһа
- Федотова Катирина Михайловна, Үөһээ Бүлүү улууһа
- Николаева Семерина Семеновна, Чурапчы улууһа
- Григорьева Анастасия Николаевна, Нам улууһа
- Антипина Светлана Викторовна, Аллараа Халыма улууһа
- Михайлова Елена Еремеевна, Амма улууһа
- Афанасьева Сахаайа Артемьевна, Мэҥэ Хаҥалас улууһа
- Чирикова Юлия Андреевна, Дьокуускай куорат
- Симакова Марина Владимировна, Алдан улууһа
- Халикова Диана Игоревна, Ленскэй улууһа
- Дягилева Саргылана Анатольевна, Таатта улууһа
- Дыкина Екатерина Васильевна, Нерюнгри улууһа.
Биэс бастыҥ иитээччи: https://rutube.ru/video/b2d6559801ee18efaf82f263650afba4/
- Афанасьева Сахаайа Артемьевна, Мэҥэ Хаҥалас улууһун “Сардаана” Майатааҕы оҕону сайыннарар киинэ-уһуйаана
- Григорьева Анастасия Николаевна, Нам улууһун Граф Биэрэгэ сэлиэнньэтин “Ромашка” уһуйаана
- Николаева Семерина Семеновна, Чурапчы улууһун Чурапчы сэлиэнньэтин П.И.Борисова аатынан “Улыбка” оҕону сайыннарар киинэ-уһуйаана
- Васильева Туйаара Геннадьевна, Сунтаар улууһун Сунтаар сэлиэнньэтин 7-с нүөмэрдээх “Солнышко” оҕону сайыннарар киинэ-уһуйаана
- Халикова Диана Игоревна, Ленскэй улууһун Ленскэй куоратын “Теремок” территориальнай үөрэтэр комплекса-уһуйаана.
Кыттааччылар долгутуулах тэрээһиннэрэ түмүктэннэ. Быйылгы “Сыл иитээччитэ-2026” күөн күрэс муҥутуур кыайыылааҕынан Нам улууһун Граф Биэрэгэ сэлиэнньэтин “Ромашка” уһуйаанын иитээччитэ Анастасия Григорьева буолла, кини Саха сирин аатын Бүтүн Арассыыйатааҕы түһүмэххэ көмүскүү барыаҕа.
Түмүккэ өрөспүүбүлүкэ 24 улууһун 25 иитээччитэ доҕордоһуу флешмобугар түмүстүлэр.
