Сахабыт сиригэр самаан сайын сатыылаабыт мааныылаах күнүгэр, бэс ыйын 5 күнүгэр, С.С.Васильев-Борогонскай аатынан Киин бибилэтиэкэ ааҕар саалатыгар «Куорсун-2026» литературнай күрэс кыайыылаахтарын чиэстиир үөрүүлээх тэрээһиҥҥэ улууспут айар куттаахтара тоҕуоруһа муһуннулар.
«Куорсун» литературнай күрэс улууспут айар куттаах дьонун өйүүр, көҕүлүүр сыаллаах, дойду үрдүнэн 2015 сылга биллэриллибит Литература сылыттан саҕаланан, үтүө үгэскэ кубулуйан, быйыл тохсус төгүлүн тэрилиннэ. Быйылгы күрэс балаһыанньатынан литература үс жанрыгар: хоһоону суруйууга, көрдөөх кэпсээни айыыга, С. Есенин «Белая береза» хоһоонун тылбаастыырга барыта 39 ааптар, 54 айымньы кытынна.
Кыайыылаахтары чиэстиир күҥҥэ Уус Алдан улууһун дьаһалтатын Дьиэ кэргэн уонна ыччат бэлиитикэтигэр отделын салайааччыта Валентина Андросова, улуустааҕы култуура управлениетын начаалынньыгын солбуйааччы Сулустаан Новоприезжай, Уус Алдан улууһун кииннэммит бибилэтиэкэ тиһигин дириэктэрэ Лена Павлова, киин бибилэтиэкэ ааҕааччыны кытта үлэҕэ отделын салайааччыта, «Уһуктуу» литературнай түмсүү салайааччыта Галина Аммосова эҕэрдэлээтилэр. Тэрээһиҥҥэ «Куорсунтан кынат анньан» иннинээҕи күрэстэргэ бастаабыт айар дьон тустарынан быыстапка чахчы бу күрэстэн кынаттанан бүтүн кинигэлээх ааптардар үүнэн-сайдан тахсыбыттарын кэпсээтэ. Оттон бибилэтиэкэ иһинэн «Уран тыл алыба» түмсүү «Куорсун» күрэстэригэр кыайыылаах буолбут хоһооннору ааҕан иһитиннэрбиттэрэ улууспутугар чахчы да суруйар дьоҕурдаах дьон баалларын, бу күрэс хайдахтаах кэрэ хоһооннору көтүппүтүн долгута итэҕэттэ.
Хоһоон көрүҥүн дьүүллүүр сүбэтигэр үлэлээбит СӨ Суруйааччыларын сойууһун чилиэнэ, «Кырсаада» литературнай түмсүү салайааччыта Галина Басылайканова-Кэнтик Кыыһа күрэскэ киирбит айымньылары сиһилии ырытан, ситимнээх үлэ барарын бэлиэтээн туран, кыайыылаахтары наҕараадалаата.
Ол курдук, I үрдэли «Эйиигин хатыҥмар холуубун» хоһоонунан Алексей Константинов – Мэнигийээн (Дьокуускай), II үрдэли «Саллаакка ахтылҕан» хоһоонунан Варвара Гуляева (Найахы), III үрдэли «Өбүгэм сирэ» хоһоонунан Глера Васильева (Дьокуускай) ситистилэр. Оттон биһирэбил бирииһинэн «Сэттэ кут туруйа» хоһоонунан Ульяна Бурнашева-Уйана (Кэптэни), «Аҕам аата» хоһоонунан Сайаана Эверстова (Дьокуускай), «Күһүн кэллэ» хоһоонунан Нюрбина Васильева (Мындааба) бэлиэтэннилэр.
Кэпсээни, буолаары буолан көрдөөх кэпсээни суруйуу олус уустук. Ол эрэн, бу көрүҥҥэ алта киһи кыттыбыта үөрдэр. Бу көрүҥү талааннаах суруйааччы, биир дойдулаахпыт Данил Макеев сыаналаабыт. Түмүккэ I үрдэли – “оҕо аахпат кэпсээнэ” айымньытынан Мария Винокурова-Уйгулаах (Курбуһах), II үрдэли – “Бастакы көҕөн араллаана” кэпсээнинэн Иннокентий Попов- Оҕуруоттаах (Суотту), III үрдэли «Мааска» кэпсээнинэн Анатолий Кириллин-ДьолуКуус (Бороҕон) ыллылар. Биһирэбил бирииһинэн Матрена Матвеева-Мотуо (Кэптэни) бэлиэтэннэ.
Сергей Есенин «Белая береза» хоһоонун тылбаастыыр көрүҥҥэ барыта 19 киһи кытынна. Тылбааһы сурналыыс, суруйааччы Бээрийэ кыыһа Хотойук Айгыына сыаналаан, кыайыылаахтары быһаарбыт. Түмүккэ, I үрдэлинэн – Елизавета Попова (Чараҥ), II үрдэлинэн Надежда Местникова (Бороҕон), III үрдэлинэн – Татьяна Готовцева (Танда), биһирэбил бирииһинэн Валентина Комиссарова-Күлүмүрэ (Томпо), Валентина Бурнашева (Кэптэни), Яна Колодезникова (Танда) наҕараадаланнылар.
Номнуо тохсус төгүлүн ыытыллыбыт «Куорсун-2026» күрэс 54 саҥа айымньыны төрөттөҕө ити. Бу айымньылартан биир да айымнньы кимиэхэ эрэ дириҥ өйү-санааны, олоххо, тулалыыр эйгэҕэ тапталы иҥэрдэҕинэ, иэйиини уһугуннардаҕына, эбэтэр бу күрэстэн куорсун анньынан талааннаах суруйааччы үүнэн таҕыстаҕына – ол буолуо күрэс суолтата, ыраламмыт ыра санаата.
Мария АРГУНОВА, Бороҕон
