Айсен Николаев «Якутия, вперед!» биэриигэ ньиэп бородууктатынан хааччыллыыга үөскээбит быһыы-майгы туһунан кэпсииригэр, тыа хаһаайыстыбатын салаатыгар ураты болҕомтотун уурда.
Саха сирин баһылыга уматыгы канистраларга атыылааһыны бобуу тыа хаһаайыстыбатын оҥорон таһаарааччыларыгар дьайбатын туһунан бэлиэтээн эттэ.
«Уматыгы канистраларга атыылааһыны бобуу киллэриллибитигэр тыа хаһаайыстыбатын үлэһиттэрэ уматыкка сыһыаннаах боппуруостаах этилэр. Бүгүн мин сорудахпынан бу хайысханан бары быһаарыылар ылылыннылар. Бырабыыталыстыба иһитиннэрбитинэн, от-мас бэлэмнээһинин уонна хомуур кэмигэр уматыгы биэрии үгэс буолбут бэрээдэгинэн ыытыллыаҕа», — диэн кини эттэ. Өрөспүүбүлүкэ салайааччыта бэлиэтээбитинэн, билигин автосапыраапкаларга быстах хааччахтааһыннар дойду үрдүнэн кэриэтэ бэлиэтэнэллэр.
«Ньиэби переработкалыыр собуоттардаах киин эрэгийиэннэргэ балаһыанньа Саха сиринээҕэр ыарахан. Дойдуга уматыгы оҥорон таһаарыы биллэ намтаабытын да үрдүнэн, өрөспүүбүлүкэ эрдэттэн уматыгы аҕалыыга ылсыбыта», – диэн кини иһитиннэрдэ.
Айсен Николаев эппитинэн, собуоттары кытта наадалаах хантараактар баттаммыттар, уматыгы тиэйэн аҕалар бөдөҥ корпорациялары кытта сөбүлэһиилэр ситиһиллибиттэр.