Бүгүн, от ыйын 2 күнүгэр, Өлүөнэ тардыытынааҕы уу салалтатын үлэһиттэрэ «Арассыыйа уута» Бүтүн Арассыыйатааҕы аахсыйаҕа уонна «Чэбэр чэппиэр» эрэгийиэннээҕи экологическай бырайыакка кытыннылар.
Бу тэрээһин СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин тэрийиитинэн, өрөспүүбүлүкэ экологическай халандаарыгар биир саамай суолталаах күн — Өлүөнэ өрүс күнүгэр ананан ыытылынна.
Тэрээһин чэрчитинэн, Өлүөнэ тардыытынааҕы уу салалтатын, СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин үлэһиттэрэ, айылҕа харыстабылыгар сыһыаннаах тэрилтэлэр үлэһиттэрэ уонна волонтердар 202-с микрооройуоҥҥа баар даамба территориятыгар субуотунньук ыыттылар.
Бу аахсыйа Өлүөнэ өрүс тардыытыгар баар оройуоннар уонна бөһүөлэктэр олохтоохторун түмтэ, тоҕо диэтэххэ, бырайыак эрэгийиэннээҕи айылҕа баайын харыстааһын боппуруостарыгар уопсастыбаннас болҕомтотун тардарга туһуланар.
Биһиги өрүстэрбит ыраас буолууларын хааччыйыы — өрөспүүбүлүкэ хас биирдии олохтооҕун күннэтэ болҕомтотун тардар уопсай сорукпут.
