Арассыыйа Сэлиэстийэлиир кэмитиэтин Саха сиринээҕи управлениетын Дьокуускай куораттааҕы силиэстийэлиир отдела киин куорат олохтооҕор Арассыыйа Холуобунай кодексын 166 ыстатыйатын 4 чааһынан (массыынаны эбэтэр атын тырааныспары уорар сыала суох, киһи олоҕор эбэтэр доруобуйатыгар кутталы үөскэтэн туран күүһүнэн былдьаан ылыы) холуобунай дьыала тэрилиннэ.
Силиэстийэ быһаарбытынан, 2026 сыл олунньу 28 күнүн түүнүгэр итирик туруктаах 40 саастаах эр киһи «Toyota Vitz» автомассыына иһигэр олорон, суоппар төбөтүгэр саа сэбин туһаайан, ытарга куттаан туран айанныырга модьуйбут. Бу туһунан СӨ Сэлиэстийэлиир кэмитиэтэ иһитиннэрэр.
Буруйдаах суоппар аккаастаммытын иһин, кинини атаҕар ыппыт уонна буутун бааһырдыбыт. Суоппар массыынаттан ыстанан тахсыбыт, ол кэмҥэ уорбаланааччы уруулга олороот, Марха бөһүөлэгэр баар дьиэ учаастагын диэки айаннаабыт. Массыына суоппара кини бас билэр тырааныспарын күүс өттүнэн былдьаан барбыттарын туһунан быраабы араҥаччылыыр уорганнарга биллэрбит. Сотору буолан баран ГАИ үлэһиттэрэ уорбаланааччыны туппуттар.
Уорбаланааччы тутуллубут уонна быстах кэмҥэ хаайар изоляторга угуллубут, саата былдьаммыт. Силиэдэбэтэл кинини хаайар наадатын туһунан хадатаайыстыба түһэрбит.
Билигин холуобунай дьыаланы силиэстийэлиир үлэлэр бараллар.