Ыам ыйын 10 күнүгэр Күнҥэ M5.8 кылаастаах эстии буолбутун туһунан РНА Космическай чинчийиилэрин институтун Күн актыыбынаһын лабораториятын дааннайыгар сигэнэн РИА Сонуннара иһитиннэрэр. Исписэлиистэр этэллэринэн, бу түбэлтэ рентген диапазоҥҥа бэлиэтэммит уонна 37 мүнүүтэ устата барбыт.
Эстии 4436 №-дээх актыыбынай бээтинэлэр бөлөхтөрүгэр тахсыбыт. Маннык көстүүлэр Күн плазматын быраҕыыларынан доҕуһуолланыахтарын сөп, олор Сиргэ тиийэн, магнитнай буурҕалары үөскэтиэхтэрин уонна спутниктар, радиосибээс, уот ситимнэрэ үлэлэригэр дьайыахтарын сөп.
«Күн актыыбынаһын кэтээн көрүү тохтоло суох ыытыллар. Маннык эстиилэр биһиги сулуспут олоҕун айылҕа циклин биир чааһа буолаллар», — диэн учуонайдар бэлиэтииллэр.
Бу түбэлтэни көрдөрөр видеолар уонна графиктар РНА Космическай чинчийиилэр институттарын Күн актыыбынаһын лабораториятын саайтыгар таҕыстылар. Космическай күн-дьыл туругун сабаҕалааһынын, ордук Күн актыыбынаһа үрдүк кэмигэр кэтээн көрөргө исписэлиистэр сүбэлииллэр.
«Эстии олус күүстээх да буолбатаҕын иһин, кини Күн уопсай динамика биир чааһа буолан, болҕомтону эрэйэр», — диэн эспиэрдэр тоһоҕолоон бэлиэтииллэр.
Бу хайыы-үйэ иккис күүстээх эстии буолар. Бу иннинэ M2.6 кылаастаах эстии ыам ыйын 7 күнүгэр бэлиэтэммитэ уонна плазманы – ионнаах гааһы бырахпыта. Плазма диэн ионнаах гаас, ол эбэтэр электроннар уонна ионнар булкаастара. Плазма үрдүк температураҕа эбэтэр күүстээх электромагнитнай хонуу дьайыытыгар үөскүүр. Өрөбүлгэ эстии эмиэ плазменнай былыт тахсыытыгар тиэрдибитэ. Оттон плазменнай былыт тахсыыта олус үрдүк энергиялаах, ол иһин тулалыыр эйгэҕэ улахан уларыйыылары оҥоруон сөп.