Ыам ыйын 16 күнүттэн Саха сиригэр музей нэдиэлэтэ саҕаланыа.
Ыам ыйын 16-23 күннэригэр «Саха сиригэр музей нэдиэлэтэ» бэстибээл саҕаланыа. Бу Ем.Ярославскай аатынан хотугу норуоттар историяларын уонна култуураларын холбоһуктаах судаарыстыбаннай музейын тэрийиитинэн ыытыллар далааһыннаах уонна болҕомтону тардар, сээҥээрдэр ураты тэрээһин.
Тэрээһин сүрүн сыала-соруга: сиэр-майгы, патриотизм уонна кэрэҕэ дьулуһуу хайысхаларын сайыннарыы.
Тэрийээччилэр экспозициялары сэргэ, араас култуурунай тэрээһиннэргэ ыҥыраллар. Манна тиэмэлэринэн араас экскурсиялар, квест-оонньуулар, маастар-кылаастар күүтэллэр. Сылдьыҥ, көрүҥ-истиҥ, билиигитин-көрүүгүтүн хаҥатыаххыт.
Бу сэргэх, ураты бэстибээл ыам ыйын 16 күнүттэн саҕаланар. Бу күн «Якутская ссылка» музей-дьиэтигэр (Ярославскай, 5 уул.) «Якутская ссылка» музей-дьиэ аһыллыбыта 75 сылыгар анаммыт «У истоков Романовки» быыстапка аһыллыыта былааннанар. Саха сирин оскуолаларын 1-11 кылаастарын үөрэнээччилэрин уонна үөрэх тэрилтэлэрин устудьуоннарын ортолоругар сыл аайы ыытыллар «Во благо Якутии» диэн XIV историческай куонкурус түмүгүн таһаарыахтара.
Бу күн Ярославскай музейа (Ленин пр. 5/2) Бүтүн Арассыыйатааҕы «Музейдар түүннэрэ» аахсыйаҕа кыттыаҕа уонна «В слове «мы» – сто тысяч «я» — Киһиэхэ – төрөөбүт сирэ, дойдута» диэн ураты чаҕылхай бырагырааманы билиһиннэриэҕэ. Бу киэһээ музей барыларын төрөөбүт дойду историятыгар, үгэстэригэр уонна култуурунай нэһилиэстибэлэригэр ыалдьыттыырга, ааспыт кэм дьикти страницаларын арыйарга, хотугу норуоттар ураты экспонаттарын, номохторун уонна үгэстэрин билсэргэ, билиини-көрүүнү хаҥатарга ыҥырар.
Бары тэрээһиннэр Ем.Ярославскай музейын куорпустарыгар (Ленин пр. 5/2) ыытыллаллар.
Сиһилии манна көрүҥ: https://www.sakha.gov.ru/news/47841
СӨ Ил Дарханын уонна Бырабыыталыстыбатын пресс-сулууспата
Хаартыска: Ем.Ярославскай музейын пресс-сулууспатыттан