Саха сирин оҕолорун тыһыынчанан суруктара байыаннай дьайыы сиригэр сылдьар биир дойдулаахтарбытыгар тиийэр. Соторутааҕыта Сунтаар улууһун оҕотун уруһуйа байыаннай дьайыыга сылдьар байыаска тиийэн, сурук ыыппыт оҕо туһунан байыас билиэн баҕарарын туһунан иһитиннэрии социальнай ситиминэн тарҕаммыта.
— Дьиктитэ диэн, байыас анараа сулууспалыыр сиригэр ити уруһуйга баар курдук харалаах-маҥан өҥнөөх куоска баар үһү. Онтон уоппускаҕа кэлэригэр маҕаһыынтан итинник өҥнөөх оонньуур куоска баарын кыыска бэлэхтээри атыыласпыт. Ону атыыһыт: «Ну, что Вася, тебя взяли», — дии-дии биэрбит. Ити оҕо куоската эмиэ Вася диэн эбит. Наһаа дьикти дии диэн бэлиэтииллэр.
Сунтаартан суруйбут оҕо аата — Максимова Айыына. Кини И.С. Иванов аатынан Сунтаар 2 №-дээх орто оскуолатын 4 кылааһын үөрэнээччитэ. Айыына элбэх оҕолоох дьиэ кэргэн кыра оҕото. Тиксииттэн көһөн кэлбиттэр. Кыыс бииргэ төрөөбүт убайа Николай байыаннай дьайыы кыттыылааҕа.
Бу байыаска суругу Айыына алтынньыга суруйбут. Гуманитарнай көмө оҥорон, суругу дьиэтигэр суруйан баран, көмөтүн кытта бакыакка суулаан укпут. Хас да байыаска анаан сурук суруйбут. Маннык суруктар дойдуларыттан ыраах сиргэ сылдьар байыастар санааларын көтөҕөллөр, бөҕөргөтөллөр, кинилэри төрөөбүт дойдуларыгар күүтэллэрин санаталлар, — диэн Сунтаар улууһунааҕы үөрэх управлениета МАХ-ка ханаалыгар иһитиннэрдэ.
