Саха сиригэр оскуола оҕолорун истэригэр хаар уонна муус оҥоһуктарга ыытыллар аан бастакытын норуоттар икки ардыларынааҕы күрэскэ 15 хамаанда кытта сылдьар.
Бу маннык тэрээһин уонна ханна да ыытыллыбат эбит. Онон Саха сиригэр ыытыллар тэрээһин аан дойдуга — соҕотох. Ол да иһин буолуо, Новосибирскайтан, Хабаровскайтан, Красноярскайтан хас да хамаанда кэлэн кытта сылдьар. Кытай Народнай Өрөспүүбүлүкэтин Харбин куоратыттан оскуола оҕолоро эмиэ кыттан, бу күрэс норуоттар икки ардыларынааҕы статустаммыт.
Мэҥэ Хаҥалас улууһун Аллараа Бэстээх орто оскуолатыгар 7-с кылааска үөрэнэр Марк Александров куонкурус туһунан аймахтарыттан истэн кэлбит. «Маннык күрэскэ аан бастаан кыттабын. Хаар уонна муус оҥоһукка үөрүйэҕим суох. Хаардааҕар мууһа ордук курдук. Хаарга — удаҕаны, мууска доҕордуу уолаттары оҥордубут. Удаҕаҥҥа ырбаахытын сарбынньаҕын чочуйдум«, — диэн кэпсиир Марк Александров.
Дьэ, онон маннык суолталаах күрэскэ аан бастаан хаарга уонна мууска холонор оҕолору эмиэ кытыннараллар эбит. Бу оҕолорго интэриэһи үөскэтэн, кэнэҕэс хаар уонна муус оҥоһуктары оҥорууга улахан маастардар тахсыахтара турдаҕа.