Нам улууһугар «Аҕа күрэҕэ-2026» күрэхтэһии түмүктэннэ. Быйылгы күрэх киэн туттар биир дойдулаахпыт, уһулуччулаах государственнай уонна политическай деятель Илья Егорович Винокуров төрөөбүтэ 130 сылыгар ананан барда.
Күрэхтэһиигэ 7 нэһилиэк бастыҥ аҕаларын уонна уолаттарын хамаандалара эрбии тииһин курдук эгил-тэгил киирсиини көрдөрдүлэр.
Ол курдук, Аппааныттан Александр уонна Саша Корякиннар, 1 Хомустаахтан Андрей уонна Валера Винокуровтар, Хатырыктан Алексей уонна Алеша Кутуковтар, Үөдэйтэн Борис уонна Ян Барашковтар, Намтан Евгений уонна Уйгун Дьячковскайдар, Түбэттэн Роман уонна Эрхан Ефимовтар, Хамаҕаттаттан Арчылан уонна Арыйаан Харатаалалар бастыҥ ааты ылар иһин сытыы киирсиилэргэ күөн көрүстүлэр.
Сэттэ көрүҥнээх күрэхтэһиигэ аҕалар уолаттарын кытта эр дьон сатабылын көрдөрдүлэр. Бэрэбинэни сулуйдулар, эрбээтилэр уонна хайытан саһааннаатылар, ойбон аллардылар, остуолбаҕа ытыннылар, уоту оттон чэй оргуттулар, түмүгэр булчут биатлонугар кииристилэр.
1 миэстэни Хамаҕаттаттан Арчылан, Арыйаан Харатаалалар ылары ситиһэн, улуус дьаһалтата туруорбут 50.000 солк. сертификатынан,
2 миэстэҕэ 1 Хомустаах нэһилиэгиттэн Валера, Андрей Винокуровтар тахсан, Хамаҕатта баһылыга Евгений Ушницкай туруорбут 30.000 солк. сертификатынан,
3 миэстэни Хатырыктан Алеша, Алексей Кутуковтар ылан, улуус дьаһалтата туруорбут 25.000 солк. сертификатынан наҕараадаланнылар.
Ону сэргэ күрэх саамай аҕа уонна саамай эдэр саастаах кыттааччылар анал ааттарынан бэлиэтэннилэр. Хас биирдии түһүмэх ахсын кыайыылаахтар мэтээллэринэн уонна грамоталарынан бэлиэтэннилэр. Нэһилиэктэр аҕа баһылыктара махтал суруктарын, өйдөбүнньүк бэлэхтэрин туттардылар.
Олохтоох уопсастыбаннас мустубут ыалдьыттары уонна кыттааччылары итии чэйинэн күндүлээн дьон махталын ыллылар.
Кыайыы көтөллөммүт Хамаҕатта нэһилиэгин аҕалаах уола Арыйаан уонна Арчылан Харатаалалар кулун тутар 21-22 күннэригэр Таатта улууһугар тэриллэр республикатааҕы күрэххэ Нам улууһун чиэһин көмүскүүр үрдүк чиэскэ тигистилэр. Бэлиэтээн этэр буоллахха, Арыйаан уонна Арчылан Харатаалалар улуус күрэҕин кыайыылаахтарынан иккис төгүлүн ааттаннылар, республикатааҕы күрэх кыттыылаахтарынан буолаллар.
Тэрээһини улуус дьаһалтатын дьиэ кэргэн уонна ыччат дьыалаларыгар отдела, Хамаҕатта нэһилиэгин дьаһалтата, общественноһа үрдүк таһымнаахтык тэрийэн дьон-сэргэ махталын ыллылар.
Хамаҕатта нэһилиэгин пресс-киинин хаартыскаҕа түһэриилэрэ уонна видеоҕа устуулара туһанылыннылар.
“Нам улууһа” МО пресс-сулууспата