Сарсыҥҥыттан алтынньы 22-25 күннэригэр Саха сиригэр “Наука0+” билим бэстибээлэ ыытыллаары турар. Аҕыс былаһаакканан барыта 179 тэрээһин буолуоҕа.
Быйылгы бэстибээл “Твоя космическая Вселенная” диэн сүрүн тиэмэлээх барар итиэннэ киһи космоска көппүтэ 65, Саха Өрөспүүбүлүкэтигэр аграрнай үөрэхтээһин, М.К. Аммосов аатынан Саха судаарыстыбаннай университета – Хотугулуу-Илиҥҥи федеральнай университет төрүттэммитэ 70 сылларыгар ананар.
“Бэстибээл дойду, өрөспүүбүлүкэ үрдүнэн билим уопсастыбаҕа миэстэтин, оруолун, дьон олоҕор билим киллэрэр суолтатын, ирдэниитин көрдөрөр, ону тэҥэ, уопсастыба сайдыытыгар, нэһилиэнньэ олоҕун таһымын хаачыстыбатын үрдэтиигэ учуонайдар үлэлэригэр болҕомтону тардар саамай киэҥ далааһыннаах”, — диэн тэрийээччилэр бэлиэтииллэр.
Бэстибээл үөрүүлээх аһыллыыта алтынньы 22 күнүгэр, сарсыарда 11 чаастан “Арассыыйа — мин устуоруйам” түмэлгэ (К.Д. Уткин уул. 5-с нүөмэрдээх дьиэтэ) буолар. Икки күн устата тустаах түмэлгэ уонна үөрэх, билим тэрилтэлэригэр араас лиэксийэлэри, маастар-кылаастары, оонньуулары, сэминээрдэри, быыстапкалары ыытыахтара.
Билиини, билими киэҥник тарҕатар соруктаах аҕыс былаһаакканан барыта 179 тэрээһин тэҥинэн барыаҕа. Билим уустук, өйдөммөт диир дьоҥҥо, ордук оскуола, уһуйаан саастаах оҕолору бу салааҕа сыһыарарга, сэҥээриини үөскэтэргэ аналлаах судургутук көрдөрөр, сылга биирдэ тэриллэр далааһыннаах тэрээһининэн буолар. Онон түгэни мүччү тутумаҥ, оҕолоргутун аҕалан билимҥэ маҥнайгы хардыыны оҥороллоругар көмөлөһүҥ.