Өскөтүн эһиги кыбартыыралаах, дьиэлээх, учаастактаах, ону тэҥэ, массыыналаах эбэтэр атын тырааныспардаах буоллаххытына, ирдэнэринээҕэр элбэх түһээни төлүү сылдьар буолуоххутун сөп. Кимиэхэ чэпчэтии көрүллэр? Ону хайдах бэрэбиэркэлиибит? Бу туһунан Объясняем.РФ быһаарар.
Ким чэпчэтиинэн туһанар бырааптаах:
— биэнсийэлээх дьон;
— оҕо эрдэхтэриттэн инбэлиит, ону тэҥэ, I уонна II группалаах инбэлиит дьон;
— Аҕа дойду Улуу сэриитин уонна атын байыаннай дьайыы бэтэрээннэрэ;
— Чернобыль АЭС саахалын туоратыспыттар, Чернобыль олохтоохторо уонна радиация саахалыгар эмсэҕэлээбиттэр;
— элбэх оҕолоох ыал;
— Сэбиэскэй Сойуус уонна РФ Дьоруойдара;
— Албан аат уордьан толору кавалердара;
— байыаннай сулууспалаахтар уонна кинилэр дьиэ кэргэттэрин чилиэннэрэ;
— анал байыаннай дьайыы кыттыылаахтара дьиэ кэргэттэрин кытта.
Холобур, биэнсийэлээх дьон хамсаабат баай-дуол иһин түһээни төлөөмүөхтэрин сөп. Маныаха чэпчэтии хас биирдии тиип биир эбийиэгэр көрүллэр. Холобур, биир кыбартыыраҕа уонна биир дьиэҕэ. Онтон атыныгар вычетын учуоттаан төлүүллэр: кыбартыыра уопсай иэниттэн нолуок ааҕыллыытыгар 20 кв.м. көҕүрэтэллэр, дьиэ иэниттэн – 50 кв.м.
Эбии чэпчэтиини эрэгийиэн уонна муниципальнай былаас быһаарыан сөп.
Чэпчэтиинэн туһанар бырааптаахпытын хайдах бэрэбиэркэлиибит?
«Справочная информация о ставках и льготах по имущественным налогам» ФНС сервис нөҥүө. Эбэтэр нолуогу төлөөччү тус кэбиниэтигэр көрүөххэ сөп. Онно эбийиэктэр уонна олорго көрүллэргэ чэпчэтиилэр туһунан билиэххэ сөп.
Хайдах оҥорторобут?
Нолуок тэрилтэтэ эбийиэккэ ханнык саамай улахан чэпчэтии көрүллэрин бэйэтэ быһааран оҥорор. Өскөтүн оннук оҥоһуллубатах түгэнигэр сайабылыанньа биэриэххитин сөп. «Обратиться в ФНС» сервис нөҥүө онлайн эбэтэр нолуок төлөөччү тус кэбиниэтинэн ыытар кыахтааххыт. Ону таһынан, нолуок иниспиэксийэтигэр эбэтэр МФЦ тиийэн сайабылыанньа биэриэххэ сөп.
Сайабылыанньаҕа 30 күн иһинэн хоруйдуохтаахтар. Өскөтүн иһитиннэрии бигэргэтилиннэҕинэ, ааспыт кэм түһээнин чэпчэтиини учуоттаан хаттаан ааҕыахтара.