Саха Өрөспүүбүлүкэтин Булуҥ улууһун суутунан 41 саастаах эр киһи РФ Холуобунай кодексын 258 ыст. 1 чааһын «а, б, г» пууннарынан (ураты харыстанар айылҕа сиригэр-уотугар улахан хоромньуну таһааран, механическай тырааныспары туһанан сокуоннайа суох бултааһын) буруйдааҕынан ааҕылынна. Бу туһунан СӨ Сууттарын холбоһуктаах пресс-сулууспата иһитиннэрэр.
2025 сыл балаҕан ыйын 17 күнүгэр бу гражданин Саха Өрөспүүбүлүкэтин ураты харыстанар айылҕа сирдэригэр киирэр Саҕастыыр арыытыгар тиийэн, хаарга снегоходунан айаннаан иһэн, овцебыкка кэтиллэ түһэн, кыылы охторон, моонньугар биирдэ быһаҕынан анньан баран, этин өлүүлээн кэбиспит. Түмүгэр сокуоннайа суох бултааһынтан судаарыстыбаҕа улахан хоромньу оҥоһуллубут, уопсай суумата 80 тыһ. солк. тэҥнэспит.
Суут мунньаҕын кэмигэр борокуруор гражданскай ирдэбил (иск) түһэрбит, хоромньуну толуйуу сууматын 400 тыһ. солк. диэн быспыт. Бу сууманы «Булт ресурсаларыгар оҥоһуллубут хоромньу кээмэйин ааҕыы ньыматыгар» олоҕуран быһаарбыттар.
Сууттанааччы суут мунньаҕар буруйун толору билиммит, оҥорбут быһыытыгар кэмсиммит, ирдэбили ылыммыт эрээри, хоромньу сууматын кыччатарга көрдөспүт.
Суут, дакаастабыллары үөрэтэн, суут мунньаҕын кыттыылаахтарын истэн баран, эр киһини РФ Холуобунай кодексын 258 ыст. 1 чааһын «а, б, г» пууннарынан буруйдааҕынан билиннэ уонна, буруйу сымнатар уонна ыаратар төрүөттэри учуоттаан, киниэхэ 1 сылга көҥүлэ быһыллара усулуобунайынан ааҕылларын уонна 1 сыллаах тургутар болдьоххо уураахтаата.
Маны таһынан, суут гражданскай ирдэбили толору толордо уонна буруйдаахтан Арассыыйа Федерациятын туһатыгар хоромньуну толуйарга 400 тыһ. солк. ирдээтэ.
Бириигэбэр сокуоннай күүһүгэр киирэ илик.