Дьокуускайга Өрөспүүбүлүкэ болуоссатыгар бэс ыйын 19 күнүгэр бу сыл бастакы үөрүүлээх уруу регистрацията буолла. Бастакы эдэр ыалларынан Александр Трубин уонна Карина Хапугина буоллулар. Бу туһунан ЯСИА суруйар.
«Биһиги «Госуслуги» нөҥүө сайабылыанньа биэрбиппит, биһиэхэ болуоссакка урууну регистрациялыырга этии киллэрбиттэрэ. Мин уонна Карина үс дьоллоох сыл бииргэбит. Мин киниэхэ төрөөбүт күнүгэр эрэстэрээҥҥэ ыал буолуохха диэн эппитим. Бүгүн биһигини кытта дьиэ кэргэммит: төрөппүттэрбит, эбэлэрбит, эһэлэрбит, убайдарбыт, эдьиийдэрбит уонна бырааттарбыт бааллар. Дьиэ кэргэн ортотугар манна баар буолуу олус долгутуулаах», — диэн Александр кэпсээтэ.
Саха Өрөспүүбүлүкэтин ЗАГС Управлениета иһитиннэрбитинэн, Саха сиригэр уруулары регистрациялыыр биир ураты миэстэтинэн «Өлүөнэ очуостара» национальнай паарка буолар. «Ураты миэстэлэр хас биирдии оройуоҥҥа бааллар. Бу болуоссакка уруу регистрацията олус истиҥник ааста. Александр уонна Карина — бу сезоҥҥа бастакынан Өрөспүүбүлүкэ болуоссатыгар урууларын регистрациялыырга быһаарыммыт эдэр дьон. Мин бу үтүө үгэс сайын устата салҕанарыгар эрэнэбин. Ону тэҥэ, уруулары регистрациялыыр былаһаакка култуура уонна сынньалаҥ пааркатыгар үлэлиир. Уруу церемонияларын ыытыы былаанын туһунан этэр буоллахха, Өрөспүүбүлүкэ болуоссатыгар өссө да босхо бириэмэлэр бааллар, ол гынан баран, бэс ыйын 26 күнүгэр, бу кэрэ даатаҕа, миэстэлэр суохтар. Сайабылыанньаны «Госуслуги» портал нөҥүө биэриэххитин уонна былаһаакканы талыаххытын сөп», — диэн ЗАГС Управлениетын салайааччыта Дария Слепцова бэлиэтээтэ.
Санатан суруйдахха, Өрөспүүбүлүкэ болуоссатыгар бастакы үөрүүлээх уруу регистрацията былырыын буолбута.