«Якутия» технопаарка резиденнэрэ байыаннай дьайыы кыттыылаахтарын тиэхиньикэнэн уонна наадалаах тэрилинэн хааччыйалларын салгыыллар. Бу үлэ «Вместе к Победе!» диэн Айсен Николаев салайар эрэгийиэннээҕи хамыыһыйатын лииньийэтинэн ыытыллар. Бу туһунан СӨ Бырабыыталыстыбатын бэрэссэдээтэлин солбуйааччы Анатолий Семёнов иһитиннэрдэ.
«Хоту Тент» хампаанньа, технопаарка резиденэ, байыаннайдар наадаларыгар теплоизоляционнай матырыйааллары оҥорор. «Зеленая энергия» хампаанньа электромотоцикллары «Эндуро» таҥар, олору хонуу усулуобуйатыгар араас соруктары толорууга туһаналлар.
«Сахадрон» хампаанньа, технопаарка уонна «Полярный» научнай-производственнай киин пилота суох авиация систиэмэтин резиденэ, байыаннайдары аныгы тиэхиньикэнэн хааччыйыыга улахан кылааты киллэрэр. Бу тэрилтэ пилота суох көтөр аппарааттары оҥорор. Билиҥҥи туругунан, байыаннай дьайыыга 2,5 тыһыынчаттан тахса дрону биэрбиттэр. Оҥорооччулар тэриллэри саҥардан, көдьүүстэрин уонна эрэллээх буолууларын үрдэтэллэр.
Анатолий Семёнов Донецкай Норуодунай Өрөспүүбүлүкэҕэ сылдьан, Саха сириттэн сылдьар байыастары кытта көрсүбүтүн туһунан кэпсээтэ.
Бу сырыы чэрчитинэн, «Боотур» доброволецтар этэрээттэригэр, «Рубикон» пилота суох авиация подразделениетыгар уонна 55-с гвардейскай морской пехота дивизиятыгар «Сахадрон» хампаанньа 250 дронун, бронемашиналары уонна гуманитарнай таһаҕаһы туттардылар.
СӨ инновацияларга, сыыппара сайдыытыгар уонна инфокоммуникационнай технологияларга миниистирин солбуйааччы, байыаннай дьайыы бэтэрээнэ, «Эр санаа» уордьан кавалера Николай Потапов фронттан төннөн баран, байыастары өйөөһүнүнэн дьарыктанар.
Анатолий Семёнов бэлиэтииринэн, өрөспүүбүлүкэ байыаннай дьайыы зонатыгар соруктары толоро сылдьар байыастарын тиһигин быспакка өйүүр. Байыастары тиэхиньикэнэн, тэрилинэн уонна гуманитарнай көмөнөн хааччыйыы СӨ былаастарын, тэрилтэлэрин уонна олохтоохторун кыттыыларынан тиһигин быспакка ыытыллар.
Бу туһунан СӨ Ил Дарханын уонна Бырабыыталыстыбатын пресс-сулууспата суруйар.