Дойду Үөрэҕириитин министиэристибэтэ уһуйааннарга анаан Арассыыйа үгэстэригэр сөп түбэһэр уонна оҕо сөпкө сайдарыгар көмөлөһөр оонньуу уонна оонньуур биир кэлим испииһэгин оҥоруоҕа. Ити туһунан миниистир Сергей Кравцов иһитиннэрдэ.
Миниистир этэринэн, саҥа миэрэ Арассыыйа бары оскуола иннинээҕи үөрэҕин тэрилтэлэрин хааччыйар систиэмэни олохтуурга туһаайыллар. Үөрэтии уонна иитии алын набора, ону тэҥэ, оҕолорго дойду устуоруйатын диэйэтэллэрин, култуура үгэстэрин, норуот идэтин уонна Арассыыйа ситиһиилэрин билиһиннэрэргэ көмөлөһөр оонньуур матырыйааллара бигэргэниэҕэ.
Федеральнай министиэристибэ көҕүлээһинин Саха сирэ өйөөтө. Өрөспүүбүлүкэтээҕи үөрэҕи сайыннарар уонна идэ таһымын үрдэтэр институт оскуола иннинээҕи, алын уонна инклюзивнай үөрэхтээһиҥҥэ хаапыдыратын сэбиэдиссэйэ Людмила Прокопьева бу быһаарыы оскуола иннинээҕи иитии систиэмэтигэр улахан суолталааҕын бэлиэтээтэ: “Уһуйаан иитиллээччилэрэ тулалыыр эйгэни оонньуу нөҥүө билэллэр, онон оонньуур матырыйаалы талыы сүрүн суолталаах. Үөрэҕирии министиэристибэтин көҕүлээһинэ педагогтар оонньуу иитэр суолтатын көрөн соруктаахтык туһаналларыгар кыаҕы биэриэҕэ. Маннык матырыйааллар көннөрү өйү-санааны эрэ сайыннарар буолбатахтар, ону таһынан кыра сааһыттан оҕону үтүө майгыга-сигилигэ, патриоттуу тыыҥҥа үөрэтэллэр, дьиэ кэргэн уонна култуура үгэстэригэр ытыктабылы иҥэрэллэр”.
Санатан эттэххэ, 2026 сылы Арассыыйа Үөрэҕириитин министиэристибэтэ үөрэх систиэмэтигэр Оскуола иннинээҕи үөрэхтээһин сылынан биллэрбитэ. Болҕомто киинигэр – уһуйаан оҕолорун иитии уонна сайыннарыы хаачыстыбатын үрдэтии, уһуйааннар инфраструктураларын тупсарыы уонна дойду саамай кырачаан гаржданнарын кытта үлэлиир педагогтары бары өттүнэн өйөөһүн. Саха сиригэр Оскуола иннинээҕи үөрэхтээһин сылын арыйыы үөрүүлээх тэрээһинэ олунньу 27 күнүгэр буолуоҕа. Бу туһунан Үөрэх уонна билим министиэристибэтэ суруйар.