Саха сиригэр орто анал үөрэх тэрилтэлэрин педагогтарыгар ыытыллар «Сыл маастара» Бүтүн Арассыыйатааҕы күрэх өрөспүүбүлүкэтээҕи түһүмэҕин түмүгэ таҕыста. Муҥутуур кыайыылааҕынан Дьокуускайдааҕы автодорожнай тиэхиньикум производствоҕа үөрэтиитин маастара Алексей Голиков буолла.
Тэрээһин «Ыччат уонна оҕолор» национальнай бырайыак «Профессионалитет» федеральнай бырайыагын чэрчитинэн ыытыллар. Быйыл күрэх алтыс төгүлүн буолла. Сүүмэрдиир түһүмэххэ педагогтартан 31 сайаапка киирбит. Финалга Дьокуускай, Мэҥэ Хаҥалас, Нерюнгри, Нам уонна Чурапчы улуустарын кэллиэстэриттэн, тиэхиньикумнартан 10 кыттааччы таҕыста.
Финалистар аһаҕас уруоктары ыыттылар, онно хамыыһыйа кинилэр методикаҕа бэлэмнэрин уонна устудьуоннары кытта хайдах үлэлииллэрин сыаналаата. Ону тэҥэ идэҕэ туһаайар тэрээһиннэр тэрилиннилэр. Күрэх түһүмэхтэрэ «Профессионалитет» кластер үс тэрилтэтигэр: С.Ф. Гоголев аатынан Дьокуускайдааҕы педагогическай кэллиэскэ, Дьокуускайдааҕы тыа хаһаайыстыбатын тиэхиньикумугар уонна В.М. Членов аатынан Дьокуускайдааҕы индустриально-педагогическай кэллиэскэ ыытылыннылар. Эспиэрдэр хамыыһыйаларын састаабыгар үлэ биэрээччилэр бэрэстэбиитэллэрэ, ону тэҥэ өрөспүүбүлүкэтээҕи уонна федеральнай күрэхтэр кыттааччылара, кыайыылаахтара буолбут преподавателлэр киирдилэр.
Күрэх түмүгүнэн муҥутуур кыайыылааҕынан Алексей Голиков ааттанна. Ону тэҥэ анал номинацияларга призердар быһаарылыннылар:
- «Мин – маастарбын» – Дмитрий Гриб, Соҕуруу Саха сирин технология кэллиэһин анал дисциплиналарга преподавателэ;
- «Маастар-кылаас» – Галина Семенова, И.Е. Винокуров аатынан Нам педагогическай кэллиэһин преподавателэ;
- «Идэҕэ тапталы уһугуннарыы» (Влюбить в профессию) – Сардана Варламова, Р.И. Брызгалов аатынан Транспортнай тиэхиньикум преподавателэ;
- «Педагогика эрэлэ» – Римма Сметанина, Дьокуускайдааҕы тыа хаһаайыстыбатын тиэхиньикумун преподавателэ.
Саха сиригэр «Сыл маастара — 2026» буолбут Алексей Голиков оҕо эрдэҕиттэн тиэхиньикэни сэҥээрэрин туһунан кэпсээтэ. Кинини массыыналар, тутуу уонна байыаннай тиэхиньикэ мэлдьи интэриэһиргэтэллэр эбит. Оскуоланы бүтэрэн баран, автоинспекция үлэһитэ буолар баҕаттан ХИФУ автодорожнай факультетыгар үөрэнэ киирбит. Ол эрээри үөрэнэр кэмигэр Алексей устудьуоннары үөрэтэрин ордук сөбүлүүрүн өйдөөбүт уонна бу идэни талбыт.
Билигин кини Арассыыйа 89 эрэгийиэниттэн бастыҥ педагогтар мустар Бүтүн Арассыыйатааҕы күрэхтэрин финалыгар өрөспүүбүлүкэ чиэһин көмүскүөҕэ. Финал балаҕан ыйын бүтүүтэ Новый Уренгой куоракка буолуоҕа. Оттон Арассыыйа бастыҥ «Сыл маастарын» аата алтынньы 2 күнүгэр, Орто анал үөрэхтээһин күнүгэр, биллиэҕэ.