Минеральные Воды куоракка бүгүн, алтынньы 15 күнүгэр, эр дьоҥҥо уонна дьахталларга дзюдоҕа Арассыыйа чөмпүйэнээтэ ыытыллар. Саха сирин сүүмэрдэммит хамаандатыттан сэттэ спортсмен кыттыаҕа.
48 киилэҕэ диэри ыйааһыҥҥа Саха сириттэн үс дзюдоистка тустара күүтүллэр. Аина Моисеева В2 бөлөххө киирдэ. Бастакы эргииргэ кини Соҕуруу Осетия — Алания спортсменката Карина Хугаевалыын киирсиэҕэ. Дойду призера Сайыына Петрова аан дойду чөмпүйэнээтин мэтээлин хаһаайката Сабина Гилязова бөлөҕөр түбэстэ. Ол эрээри, кини маҥнай Краснодартан сылдьар Офелия Устянныын тустуоҕа, оттон бу паара кыайыылааҕын Москва спортсменката Виктория Волощук күүтүөҕэ. Саха сирин хамаандатыттан бу ыйааһыҥҥа үһүс кыттааччынан Виктория Матаркина буолуоҕа. Кинини утары кадеттарга Европа Куубагын кыайыылааҕа, Краснодартан сылдьар Екатерина Жданова тахсыаҕа.
52 киилэҕэ диэри ыйааһыҥҥа Арассыыйа икки төгүллээх чөмпүйүөнкэтэ Карина Ефимова бастакы нүөмэринэн таҕыста. Кини маҥнай Москваттан Виктория Рыжиктыын, оттон иккис эргииргэ — Пермь куораттан София Коневалыын киирсиэҕэ. Бу ыйааһыҥҥа Саха сириттэн Диана Вихарева юниордарга Европа Куубагын кыһыл көмүс мэтээллээҕин Анастасия Петрованы утары тустуоҕа.
Полина Иудина 70 киилэҕэ диэри ыйааһыҥҥа көстө. Ааспыт сылга кини дойду чөмпүйэнээтигэр 78 киилэҕэ боруонса мэтээл иһин тустан, түмүгэр бэһис миэстэни ылбыта. Саҥа ыйааһыҥҥа кини бастакы утарсааччытынан Соҕуруу Осетия — Аланияттан Илона Зозирова буолуоҕа. Ленскэй улууһуттан Арассыыйа хас да төгүллээх призера Надежда Татарченко (78 кг диэри) иккис эргииртэн Самараттан сылдьар Екатерина Ягичтыын киирсиэҕэ. Саха сирин хамаандатын Арассыыйа чөмпүйэнээтигэр кыттыыны кини саҕалыаҕа. Тустуулар алтынньы 15 күнүгэр былааннаналлар. Бээтинсэҕэ Полина Иудина тустуоҕа. Оттон субуотаҕа Саха сирин атын бары дзюдоисткалара киирсиэхтэрэ.
Санаттахха, чөмпүйэнээт кыайыылаахтара 250-нуу тыһыынча солкуобайы ылыахтара, оттон кинилэр тириэньэрдэригэр 100-түү тыһыынча бэриллиэҕэ. Иккис миэстэ иһин 150-тыһыынча, оттон үһүс миэстэҕэ 60-тыһыынча солкуобай көрүллэр. Бу күрэхтэһии Арассыыйа сүүмэрдэммит хамаандатын састаабыгар киирэргэ сүрүн сүүмэрдиир түһүмэҕинэн буолар.