Горнай улууһун Бэрдьигэстээх нэһилиэгэр сыл аайы олохтоох нэһилиэнньэ көҕүлээһинин өйүүр бырагыраама (ППМИ) чэрчитинэн үс саҥа бырайыак олоххо киирэр.
Бу туһунан сиһилии Бэрдьигэстээх нэһилиэгин баһылыгын солбуйааччы Ксения Васильева маннык сырдатта:
— Быйылгы сылга С. Павлов, Р. Андреева ааттарынан, Мир уулуссалар өрөмүөннэнэн, А. Пафренов аатынан успуорт саалата уонна Мэхээлэ Дьөгүөрэп аатынан сынньалаҥ киин фойета тупсарыллан, нэһилиэк олоҕо өссө тупса түстэ.
Аны эһиилги сылга киллэриэхтээх бырайыактарга бэлэмнэнии үлэтин номнуо саҕалаатыбыт. Бастаан балаҕан ыйыгар түөлбэлэринэн этиилэри хомуйуу үлэтин ыыппыппыт. Ол кэннэ куйаар ситимин нөҥүө куоластааһын буолбута. Манна элбэх куолаһы ылбыт биэс этии уопсай мунньаҕынан талыыга киирдэ.
Ол курдук, алтынньы 14 күнүгэр А.А. Агеев аатынан успуорт уораҕайыгар түмүктүүр мунньаҕы тэрийдибит. Тэрээһиӈӈэ уопсайа 467 Бэрдьигэстээх олохтооҕо көхтөөх кыттыыны ылла.
Түөлбэлэринэн, тэрилтэнэн түмсэн, суруктаах-таймалаах, былакааттаах кэлэн, нэһилиэк кыһалҕаларын быһаарар бырайыактары таллылар.
Куоластааһын түмүгүнэн, элбэх куолаһы ылбыт 3 бырайыак өрөспүүбүлүкэтээҕи күрэххэ кыттар кыахтанна. Бу бырайыактар Бэрдьигэстээхпит инники сайдыытыгар улахан суолтаны ылыахтара:
1) «Өрөгөй» «Албан аат» түөлбэтигэр ханааба оҥоруу.
2) «Үрдэл» түөлбэ кытыы уулуссаларыгар уот тардыы.
3) Дорожная, Песчаная, Сарыал, Семенова-Пятилетка уулуссалар өрөмүөннэниэхтэрэ.
Ити курдук, олохтоох нэһилиэнньэ көҕүлээһинин өйүүр бырагыраамма нэһилиэк дьонун түмэр, көхтөөх буолуутун үрдэтэр. Быйылгы олохтоох көҕүлээһини өйүүр тэрээһин Бэрдьигэстээххэ бары улуустарга холобур буолар гына ыытылынна. Бу курдук, тэрээһиннээх мунньахтары сэлиэнньэ салалтата олохтоохтору кытта бииргэ былааннаан, толкуйдаан быһаарыныы ылынар буолан, кэлиҥҥи сылларга Бэрдьигэстээх киһи билбат гына куораттыы сайынна, тубуста. Онон Бэрдьигэстээх олохтоохторун холобура батыһыннарыылаах буоллун!