Биһиги өбүгэлэрбит: «Сир быйаҥнаах, киһи сатабыллаах», – диэн мээнэҕэ эппэтэхтэр. Ол эбэтэр төрүт дойду быйаҥа уонна киһи үлэҕэ-хамнаска сыһыана, кыһамньыта, дьоҕура ситиһиилээх үлэ төрүөтүнэн буолар. Евдокия уонна Кирсан Петровтар аҕаларын ууһун төрүт сирдэригэр олохсуйан, удьуор утумун салҕыы сылдьаллара – бэйэтэ кэрэ кэпсээн.
Бүгүҥҥү дьоруойдарбыт Евдокия уонна Кирсан Петровтар күҥҥэ көрбүт үс уол уонна биир кыыс оҕолоро бары ыаллар, оҕолонон-урууланан, төрөөбүт дойдуларыгар олороллор, үлэ үөһүгэр сылдьаллар. Евдокия Петровна идэтинэн лаборант, Кирсан Константинович гааһынан хааччыйар идэҕэ үөрэммитэ. Иккиэн өр сылларга идэлэринэн үлэлээн баран, улахан ыал аҕа баһылыга үөскээбит-улааппыт таптыыр сайылыгын «Лампа» диэн бааһынай хаһаайыстыбаны тэриммитэ. Ол тула аймахтарын түмэн, төрөппүттэрин олохторун, сыраларын уурбут үлэлэрин дьоһуннук салҕыыр.
Евдокия Петровна: «Дьоммут курдук, биһиги эмиэ дойдубутун сөбүлүүрбүт, ытыктыырбыт бэрт буолан, төрүт сирбитигэр үлэлии-хамсыы сылдьабыт. Киэн туттарбыт элбэх. Биһиги Лампабытыттан улуу бэйиэт Иван Слепцов-Арбита төрүттээх. Ийэтинэн Табаҕаттан төрүттээх Күннүк Уурастыырап «Лоокууттуун кэпсэтии» диэн 1936 сыллаахха суруйбут сааһыттарга аналлаах көрдөөх поэматыгар аҕабыт таайын ахтыбыта баар (аҕабыт кини аатын ылбыт):
«Тараҕай ыччата Кырысаан
Табаҕа таһынан сылдьыаҕа –
Чаҥнардаах Лампатын уутугар
Чаастарын, күннэрин ыытыаҕа».
Маны биһиги олус үчүгэйдик саныыбыт. Дьоммут, аҕабыт, оҕолорбут оҕо саастара бу таптыыр, ахтар Лампа сайылыкпытыгар ааспыта. Билигин даҕаны онно дьоммут сайылыыллар, сиэннэрбитин, оҕолорбутун кытары оттуубут, сир астыыбыт.
Сиһилии «Саха сирэ» хаһыат бэс ыйын 5 күнүнээҕи нүөмэригэр ааҕыҥ