IX ыҥырыылаах Судаарыстыбаннай Дуума быыбарыгар 29 №-дээх Саха сиринээҕи биир мандааттаах быыбардыыр уокурукка 9 хандьыдаат турда. Бу быыбар хампаанньата кэнники сылларга саамай киэҥ, улахан буолара сабаҕаланар.
Дойду үрдүнэн араас таһымҥа 2,2 тыһыынчаттан тахса быыбардыыр хампаанньалар тэҥинэн ыытыллыахтара. Ол улахан тэрийэр үлэни, бэлэмнээх буолууну ирдиир.
— Биллэн турар, аныгы быыбардыыр хампаанньаҕа күрэстэһэр кыах баара биир бэлиэ түгэн буолар. Быыбарга хас да бэлитиичэскэй баартыйалар кытталлар.
Бүгүн өрөспүүбүлүкэбитигэр биһиги маннык балаһыанньаны көрөбүт. 9 хандьыдаат араас бэлитиичэскэй баартыйалартан: «Биир ньыгыл Арассыыйа», «Сиэрдээх Арассыыйа», КПРФ, «Саҥа дьон», «Родина», «Коммунисты России», «Яблоко», «Зеленые» баартыйалартан турдулар. Биһиги быыбардааччыларбыт араас баартыйалар бырагыраамаларын билсиэхтэрэ. Хампаанньа кыттааччылара аҕытаассыйаны ыыталларыгар, көрсүһүүлэри тэрийэллэригэр, дебакка кытталларыгар бары тэҥ бырааптаахтар, — диэн Уопсастыбаннай кэтээн көрүү киинин салайааччы Владислав Окороков бэлиэтээтэ.