Таатта улууһугар уу биологическай ресурсаларын, ол иһигэр Арассыыйа Кыһыл кинигэтигэр киирбит сэдэх балыктары сокуоннайа суох эргинии чахчыларынан холуобунай дьыалалар тэрилиннилэр. Бу туһунан СӨ Борокуратуурата иһитиннэрэр.
Таатта улууһун борокуратуурата РФ Холуобунай кодексатын (УК РФ) 171.1 ыст. 4-с чааһын «б» пуунунан (булгуччулаах бэлиэтэ, маркировката суох ас-үөл табаарын атыылыыр соруктаах олус улахан кээмэйгэ эргинии) үс холуобунай дьыала, ону тэҥэ 258.1 ыст. 1-кы чааһынан (Арассыыйа Кыһыл кинигэтигэр киирбит ураты сыаналаах уу биологическай ресурсаларын сокуоннайа суох атыылаһыы, харайыы, таһыы) биир холуобунай дьыала тэриллибитин сокуоннайынан билиннэ.
Бу холуобунай дьыалалар Үөһээ Халыма улууһун Зырянкатыттан, Булуҥ улууһун Найбатыттан уонна Быковскайыттан Дьокуускай куоракка диэри икки «Камаз» уонна биир «SITRAK 7066-S7» массыынанан Евразиятааҕы экэнэмиичэскэй сойуус уонна Таможеннай сойуус тэхиниичэскэй регламеннарын ирдэбиллэригэр эппиэттээбэт (бэлиэтэ суох) балык бородууксуйатын сокуоннайа суох таһа сатаабыт чахчыларынан тэриллиннилэр.
Маны таһынан, биир «Камаз» массыынаҕа Арассыыйа Кыһыл кинигэтигэр киирбит «Халыматааҕы Сибиир хатыыһа» диэн сэдэх балык туох да арыаллыыр докумуона суох 245 устууката көһүннэ. Массыыналары Таатта улууһун территориятыгар ГАИ үлэһиттэрэ тохтоппуттар.
Уопсайа 32,5 туонна кэриҥэ ыйааһыннаах тутуллубут табаар сыаната 24 мөл. солкуобайтан тахса буолла.
Билиҥҥи кэмҥэ холуобунай дьыалаларынан силиэстийэлиир дьаһаллар ыытыллаллар, силиэстийэ хаамыыта борокуратуура хонтуруолугар турар.