«Удьуор харалы дьон. Дьүлэй нэһилиэгэ» кинигэ сүрэхтэниитэ бүгүн Таатта Туора Күөлүгэр буолла. Кинигэни биэс сыл устата хомуйан, архыыбы хасыһан үгүс матырыйаалы хомуйбут Саргылаана Ивановна Неустроева буолар.
Кини бу тула санаатын үллэһиннэ:
— Кинигэ тахсан күн сирин көрүүтэ биһиги нэһилиэкпит устуоруйатыгар улахан суолталаах. Мэхэньисээтэрдэр тустарынан кинигэ тахсыытын идиэйэтэ биэс сыллааҕыта киирбитэ. Бу — суруктан-бичиктэн ыраах дьон. Онон хас биирдиилэрин кытта сирэй көрсөн ахтыы хомулунна. Архыыбы кытта үлэлэһии сыралаах эрээри, үтүө түмүктээх үлэ. Мэхэньисээтэрдэри, тырахтарыыстары, суоппардары кытта көрсөн кэпсэтэн, сорохтортон суругунан ылан, үгүс үлэ ыытылынна. Нэһилиэкпитигэр олорон, үлэлээн-хамсаан ааспыт ытык, туруу үлэһит дьоммут туһунан кинигэ нэһилиэкпит дьонугар-сэргэтигэр дьоһун бэлэх буолла. Бүтүн нэһилиэк дьоно-сэргэтэ бары күргүөмүнэн көмөлөһөн бөдөҥ, дириҥ суолталаах кинигэ оҥоһуллан таҕыста.
Нэһилиэк баһылыга Олег Дмитриевич Осипов:
— Нэһилиэкпит устуоруйатыгар сыһыаннаах бу номнуо хаһыс да кинигэ буолар. Саргылаана Ивановна, Иван Гаврильевич Неустроевтар көҕүлээһиннэринэн бөдөҥ кинигэ күн сирин көрдө. Саргылаана Ивановна улахан үлэни көрүстэ. Кырдьаҕастартан ыйыталаһан, сирэй көрсөн ахтыы бөҕөтүн хомуйда. Маны сэргэ, успуонсардары бэлиэтиэххэ наада. Биир дойдулаахтарбыт Ханиннар дьиэ кэргэттэрэ кинигэ тахсыытыгар 200 тыһ. солк. көмө оҥордулар, ону сэргэ Неустроевтар дьиэ кэргэн оҕолоро эмиэ өйөөтүлэр.
Кинигэ сүрэхтэниитин бэтэрээн бибилэтиэкэр, СӨ култууратын туйгуна Татьяна Егоровна Захарова кинигэни ырытыыттан саҕалаата. Ол кэннэ олохтоохтор кинигэ тула санааларын үллэһиннилэр.