Биһиги сайыҥҥы итии күннэри уһуннук күүтэбит, ол эрээри куйаас түстэҕинэ «хаһан сөрүүдүйэр» диибит. Бу кэмҥэ саамай улахан кыһалҕанан — утуйар уу көтөрө буолар. Итии түүннэргэ хайдах түргэнник уонна уоскулаҥнык утуйуохха сөбүн туһунан сомнологтар маннык туһалаах сүбэлэри биэрэллэр.
1. Уунан эмтэнии
Куйааска утуйуон иннинэ сылаастыҥы дууска киирэр ордук (киһи бэйэтин этин температуратыттан тымныы буолуо суохтаах). Бу ньыма куйаастан сылтаан үөскээбит истирэһи уонна эт-сиин итиитин намтатар. Ону таһынан, атахха сылаас ванночка оҥостуохха сөп.
2. Утуйар хоһу хайдах сөрүүн гынабыт?
Утуйар хоһу вентиляторынан сөрүүн гынар ордук. Кондиционертан сэрэхтээх буолуҥ: сириэдийэр куйааска туһалаах эрээри, хос температуратын 17 кыраадыстан намтаттахха, киһи кыайан утуйбат уонна уута алдьанар.
3. Түүн уһуктан хааллахха…
Өскөтүн түүн куйаастан уһуктан хааллаххытына, эккитин тымныы уунан сотунуҥ эбэтэр сиик таһаарар тэрили туһаныҥ.
4. Ууну элбэхтик иһиҥ!
Күнүс устата ууну элбэхтик иһэр буолуҥ. Бу түүн устата эт-сиин бэйэтин температуратын уоскутарыгар улахан көмөлөөх.
5. Дьиэ иһинээҕи килиимэт
- Өскөтүн күнү-түүнү быһа итии буоллаҕына: күнүс дьиэ аанын уонна түннүктэрин арыйбат буола сатааҥ, хостору халыҥ сабыынан күлүктээҥ. Кондиционеры бэйэҕит хоско суох кэммитигэр холбоон хаалларар ордук.
- Өскөтүн сөрүүн кэмнэр баар буоллахтарына: холобур, сарсыарда эрдэ эбэтэр киэһэ хойут дьиэни салгылатыҥ. Сылыйан барыытыгар түннүктэри тута сабыҥ.
6. Утуйар эрэсиимҥэ сүбэлэр
- Куһаҕаннык утуйбут буоллаххытына: сылайдым диэн киэһэ эрдэ сытымаҥ. Көннөрү утуйар ууҥ кэлиэр диэри күүт.
- Күнүскү уу: күүстээх куйааска күнүс утуйан ылыы олус туһалаах. Ол эрээри уу кэмэ уһун буолуо суохтаах (20 мүнүүтэ курдук) уонна күнүс 14:00 чаастан хойутаабакка утуйуохха наада.
- Эрдэ уһугуннахха: ороҥҥо сыта сатаамаҥ, туран тугу эмэ дьарыктаныҥ. Сарсыардааҥҥы сөрүүн салгыҥҥа хаама тахсыахха эбэтэр кинигэ ааҕыахха сөп.