Былырыын 809 тыһ. кв.м. олорор дьиэ тутуллубута. Быйыл дойду үрдүнэн тутуу тэтимэ араас биричиинэнэн намтаан турар кэмигэр, Саха сиригэр 690 тыһ.кв.м. олорор дьиэни үлэҕэ киллэрии былааҥҥа турар.
Оттон тутааччылар кэтэх дьиэни тутуунан тэҥнээн биэрдэххэ, былырыыҥҥы көрдөрүүгэ да тахсыахха сөп, дииллэр.
Быһа лииньийэ кэмигэр Ил Дархан территорияны кэлимник сайыннарыы Дьокуускайга да, улуустарга да быдан көдьүүстээҕин тоһоҕолоон бэлиэтээтэ. Ол туоһутунан “Звезднай” түөлбэ тутуллуута буолар, бу мэхэньиисим федеральнай, өрөспүүбүлүкэтээҕи, куорат өйөбүллэрин туһанар. Эмиэ маннык кэлим тутуу “Спортивнай” түөлбэҕэ бара турар. 30-ча дьиэ олохтоохторо тарҕатыллыбыттар. Өрүс пуорда турбут сиригэр реновациянан 5-10 сылынан аныгы куорат кыбартаала олоххо киирэн эрэр.
Тутуу куораттарга эрэ буолбакка, улуустарга эмиэ көхтөөхтүк барар. Ол курдук, Намҥа муниципальнай бырагырааманан элбэх этээстээх дьиэлэрдээх кыбартаал тутуллуоҕа. Онон төһө да уустуктар баалларын үрдүнэн, Саха сирэ иннин диэки эрэллээхтик баран иһэр, диэтэ Ил Дархан.