Сытыы инфекцияны көбүтэр хантавирустар аан дойду үрдүнэн тарҕаныахтарын сөп. Бу туһунан Новосибирскайдааҕы судаарыстыбаннай университет бионанотехнологияҕа, микробиологияҕа уонна вирусологияҕа лабораториятын сэбиэдиссэйэ, РАН академига, вирусолог Сергей Нетесов иһитиннэрдэ.
«Хантавируснай тыҥа ыарыытын көбүтэр вирустар, хомойуох иһин, сэдэх буолан бүттүлэр», — диэн Сергей Нетесов Норуоттар икки ардыларынааҕы экологическай устудьуоннар кэмпириэнсийэлэригэр лиэксийэ ааҕар кэмигэр эттэ. Кини бу вирус аан дойду үрдүнэн тарҕанар кутталлааҕын бэлиэтээтэ.
Хантавирус диэн тугуй?
Хантавируснай синдром — куттааллаах ыарыы. Маны сүрүннээн Андес диэн вирус көбүтэр. Бу вирус киһиэхэ үксүгэр кутуйахтар уонна атын кэрбээччилэр саахтарын, ииктэрин салгыны кытта эҕирийдэххэ сыстар. Оттон сорох түбэлтэҕэ (чугастык алтыстахха) киһиттэн киһиэхэ сыстыан эмиэ сөп.
Вирусолог быһаарарынан, Андес вирус тарҕанарыгар дьон кутталлаах сирдэргэ элбэхтик туристыы бараллара, ол иһигэр полюстарга уонна Соҕуруу Америкаҕа айанныыллара улахан дьайыылаах. Ону тэҥэ дьон айылҕаҕа вирус мунньуллубут сирдэригэр сылдьаллара кутталы үөскэтэр.
Санатан эттэххэ, быйыл ыам ыйын 10 күнүгэр MV Hondius диэн круизнай лайнерга хантавирус ыарыыта турбута. Ыам ыйын 11 күнүгэр дьону лайнертан эвакуациялаан бүппүттэрэ, уонна хараабыл отутча экипаж чилиэнин кытта Нидерланды диэки айаннаабыта. Аан дойдутааҕы доруобуйа харыстабылын тэрилтэтэ ыарыы туһунан ыам ыйын 2 күнүгэр билбитэ. Кэлин биллибитинэн, онно Андес вируһунан 13 киһи сыстыбыта бигэргэтиллибитэ уонна 3 киһи олоҕо быстыбыта.