Алтынньы 26 күнүгэр Саха сирин Ил Дархана Айсен Николаев «Кыайыыга — бииргэ!» өрөспүүбүлүкэтээҕи хамыыһыйа кэҥэтиллибит мунньаҕын салайан ыытта. Манна анал байыаннай дьайыы кыттыылаахтарын уонна кинилэр дьиэ кэргэттэрин кэлимник өйөөһүн, буойуннары эбии тэрилинэн хааччыйыы, ону таһынан Донецкай Норуодунай Өрөспүүбүлүкэтин Докучаевскай куоратыгар Саха сирин инфраструктурнай бырайыага хайдах олоххо киирэрин көрдүлэр.
«Сыл устата байыаннай сулууспалаахтары уонна кинилэр дьиэ кэргэттэрин өйөөһүҥҥэ араас хайысханан улахан үлэ ыытылынна», — диэн Ил Дархан бэлиэтээтэ. 2022 сылтан АБДь кыттыылаахтарыгар өйөбүл дьаһаллара көрүллэллэр, оттон 2023 сылтан кэлим реабилитация оҥоһуллан саҕаламмыта. Билигин эрэгийиэҥҥэ 46 өрөспүүбүлүкэтээҕи уонна 9 муниципальнай таһымнаах өйөбүл көрүҥэ үлэлиир. Кэлим өйөбүлгэ наадыйар буойуннары уонна кинилэр дьиэ кэргэттэрин булан, тутатына көмөлөһөр үлэни Ил Дархан сүрүн соругунан ааттаата: «Бу саамай тутаах хайысха, манан былаас бары уорганнара уонна бүтүн уопсастыба дьарыктаныахтаах».
Бу хас да хайысхалаах улахан тиһиктээх үлэ:
- Доруобуйа: киһи туругун сыаналааһын, психологическай көмө, мэдиссиинэ көмөтө уонна доруобуйаны бөҕөргөтүү.
- Адаптация: үлэҕэ киллэрии, уопсастыбаҕа уонна бэйэни көрүнүүгэ төнүннэрии.
- Социальнай өҥө: дьиэҕэ-уокка тиийэн көрүү-истии, юрист, психолог, педагог көмөтө. Ону таһынан, сокуонунан көрүллэр чэпчэтиилэр тустарынан дьоҥҥо тутатына иһитиннэрии.
АБДь кыттыылаахтарын эбии тэрилинэн хааччыйыы тохтобула суох баран иһэр. 2026 сылга Саха сириттэн фроҥҥа 155 массыына уонна 275 туоннаттан тахса гуманитарнай таһаҕас ыытылынна. «Якутия» уонна «Полярные авиалинии» авиахампаанньалар көмөлөрүнэн 37 туонна таһаҕас госпиталларга уонна АБДь зонатыгар тиэрдилиннэ. Оттон Норуот сомоҕолоһуутун күнүгэр уонна буолуохтаах Фашизмы утары пуорумҥа анаан Саха сирин олохтоох бородууксуйатыттан 20 туонна аһылык баһыылката буойуннарга ыытылынна.
Докучаевскай куоракка Саха сирэ оҥорор инфраструктурнай бырайыага туспа көрүлүннэ. 2024 сыл тохсунньутуттан өрөспүүбүлүкэ куорат социальнай уонна хомунаалынай эбийиэктэрин сөргүтүүгэ, олохтоохторго көмөлөһүүгэ күүскэ үлэлиир.
Айсен Николаев бэлиэтээбитинэн, былааннаммыт үлэ барыта кэриэтэ оҥоһуллубут. «Хаачыстыбата да, үлэни толоруу болдьоҕо да биһиги өрөспүүбүлүкэбит Арассыыйа Федерациятын субъегын быһыытынан ылыммыт эбээһинэһин чиэстээхтик толорорун туоһулуур», — диэтэ Ил Дархан.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.