Ханна табахтыыр бобулларын уонна ыалларгыт подъезка табахтыыр буоллахтарына, тугу гынар туһунан объясняем.рф быһаарар:
Эһиги маннык түбэлтэлэргэ үҥсэр бырааптааххыт:
— подъезтарга уонна кирилиэс былаһааккаларыгар табахтаатахтарына;
— лифтка уонна лифтка киириигэ табахтаатахтарына;
— көрүдүөрдэргэ табахтаатахтарына;
— уопсай болкуоннарга табахтаатахтарына.
Дьайыылар бэрээдэктэрэ
Бастаан ыалгытыныын кэпсэтэн көрүҥ. Буруо эһиги кыбартыыраҕытыгар киирэн мэһэйдиирин быһаарыҥ. Ол даҕаны кэнниттэн кини син биир подъездка табахтыыр буоллаҕына:
— кэһиини хаартыскаҕа түһэриҥ эбэтэр видеоҕа устуҥ;
— атын ыалларыттан балаһыанньаны бигэргэтэллэригэр көрдөһүҥ;
— салайар хампаанньаттан камера устууларын ыйыталаһыҥ.
Салгыы полицияҕа сайабылыанньа суруйуохха сөп. Онно ким, ханна, хаһан уонна төһө өр табахтыырын сиһилии суруйуҥ. Саамай сүрүнэ — дакаастабыллары сыһыарыҥ.
Көҥүллэммэт сиргэ табахтааһын иһин 500-тэн 1500 солкуобайга диэри ыстараап көрүллэр. Табахсыт хаста тутуллубутуттан тутулуга суох, хас биирдии түбэлтэтигэр ыстарааптаныа. Бу хааччах электроннай сигареталарга эмиэ тарҕанар.
Эһиги кыбартыыраҕытыгар буруо мэлдьи киирэр буоллаҕына, суут нөҥүө моральнай охсууну толуйтарыыны ирдиэххитин сөп.
Болкуоҥҥа табахтыахха сөп дуо?
Болкуоҥҥа табахтыыры туспа бобор сокуон суох, ол эрэн киһи сэрэхтээх буолуохтаах: умуллубатах бөппүрүөскэттэн баһаар тахсыан сөп. Маны таһынан, ыалларгытыгар мэлдьи буруо мэһэйдиир буоллаҕына, кинилэр эмиэ суукка биэрэр бырааптаахтар.