Улуу Кыайыы күнүгэр улуус уонна нэһилиэк аайы тыыл бэтэрээннэрэ араас бэлэҕи тутан үөрдүлэр.
Өймөкөөн улууһун ытык кырдьаҕастарыгар улуус баһылыга Александр Оконешников тыыл бэтэрээннэрин бэйэтинэн тиийэн эҕэрдэлээн, 50 тыһыынча суумалаах харчынан бэлэх сэртипикээтин туттарда. Ытык дьон бу харчыны бэйэлэрин каарталарыгар эрдэ түспүтүн тутан олороллоро. Онтон сорох нэһилиэктэргэ улуус дьаһалтатын исписэлиистэрэ бэтэрээннэргэ анаан тиийэн сэртипикээттэри туттардылар.
— Өймөкөөн улууһугар 12 тыыл бэтэрээнэ баар. Кинилэр Томторго, Өймөкөөҥҥө, Төрүккэ олороллор. Улуус дьаһалтата уонна улуус дьокутааттарын сэбиэтэ оройуон бэтэрээннэригэр харчынан эбии өйөбүлү оҥорорго быһаарбыппыт. Былырыын тыыл бэтэрээннэрин каарталарыгар 20-лии тыһыынча солкуобайы ыыппыппыт. Оттон быйыл 50-нуу тыһыынча солкуобайы ыыттыбыт.
Бэтэрээннэрбитигэр махталбытын тылынан эрэ буолбакка, чопчу дьайыынан көрдөрүөххэ наада диэн соруктаах үлэлиибит. Сүрүн болҕомтобутун ытык дьоммутугар уурабыт, — диэн бэлиэтээтэ “Өймөкөөн улууһа” МТ баһылыга Александр Оконешников.