Бүгүн «Тэтим» араадьыйаҕа норуот синоптига Тускулу үбүлүөйдээх 70 сааһынан эҕэрдэлээн аҕай биэрдилэр.
Бэл, үгэс быһыытынан аатырбыт Полина Победа Тускулга бэйэтинэн хоһоон айбытын хаста да аахтылар. Мин киэһээҥҥи эҕэрдэни түбэһэ истэн баран, соһуйан Тускулга эрийээччи буоллум. «Хайаа-а-а, ыам ыйын 14-гэр этэ дии төрөөбүт күнүҥ! Хаһан уларыйбытай ол?» диэн ыйыппыппар, норуот синоптига холку бэйэлээхтик маннык хоруйдаата:
— Ээ, бүгүн күнү быһа төлөпүөнүм оргуйа олорор. Эҕэрдэлииллэр даҕаны, ити эн курдук соһуйаллар даҕаны… Нууччалыы эттэххэ, «оригинальнай» киһи төрөөбүт күнүм кытта «эриэхэбэй» устуоруйалаах ээ. Бүгүҥҥү халандаарга «Тускул төрөөбүт күнэ» диэн сурулла сылдьар үһү. Кырдьык, сибидиэтэлистибэбэр «прописнойунан» — «11 мая» диэн сурулла сылдьар. Аны сыыппаратыгар «14.05.1956» диэн суруллубут. Оччолорго, эдэрбэр аахайбат этим. Былыргы дьон «тугу эрэ буккуйбуттар» дии саныырым. Дьиҥэр, докумуон буоллаҕа. Ким да болҕомтоҕо уурбат этэ. Биһиги саҕана оҕоҕо төрөөтүн кытта буолбакка, үс күн тохтуу түһэн баран биэрэллэр эбит. Ол аата үс күн иһигэр оҕо өлбөккө, тыыннаах хаалан, күн сиригэр кэлбитин «бигэргэттэҕинэ» эрэ биирдэ сибидиэтэлистибэ бэриллэр эбит. Ийэм өссө: «Эн Улуу Кыайыы күнүгэр төрөөбүтүҥ. Аҕаҥ үөрүүтүттэн өлөрбүт хааһын мииннии охсон аҕалбыт этэ. Оҕобун Ийэ Айылҕа бэйэтинэн айхаллыы көрүстэ диэбитэ», — диэн кэпсиирэ. Онон төрөөбүт күнүм буккуур диэххэ сөп. 50, 55, 60 саастарбын үлэлээбит кэлэктииппэр «Саха» НКИХ анаан чиэстээн бэлиэтээбиттэрэ. 65 сааспар — дьаҥ туран, бары дьиэттэн тахсыбат аакка барбыппыт. Эгэ, үбүлүөйдүү сылдьыаҥ баара дуо? Оннук тыаһа-ууһа суох ааспыта. Быйыл 70 сааспын туола да иликпинэ, сарсыардаттан айхаллаан уһугуннардылар. Араадьыйаҕа эппиттэр үһү. Бу сыллар тухары төрөөбүт күммүн ыам ыйын 14 күнүгэр бэлиэтээн кэллим. Өбүгэ саҕаттан 70 сааһы бэлиэтээбэттэр дииллэрин, саха киһитин быһыытынан тутуһуом. Аныгы үйэ буолан, үгүстэр бу итэҕэли тутуспат буоллулар, ньиргиччи бэлиэтииллэр. Мин дьиэбэр сахам аһынан кэргэммин кытта чэйдиэхпит. 75 сааспын бэлиэтиэм. Онон үс хонук инниттэн эҕэрдэ туппут киһи быһыытынан өйбөр-санаабар бу бүгүҥҥү түгэн хаалыа буоллаҕа, — диэн норуот синоптига Тускул санаатын үллэһиннэ.
Бу кэмҥэ кини помидорун уонна биэрэһин тэпилииссэҕэ көһөрөр түбүгэр сылдьар.
Оттон Кыайыы күнүгэр Чурапчы улууһун Хайахсыт нэһилиэгин баһылыга Тарас Тарасов саҥа Кыайыы болуоссатын бар дьонун кытта арыйда.
Дьэ, онон, кырдьык, «оригинальнай» киһи барытыгар — ураты. Оннооҕор төрөөбүт күнэ кытта ураты устуоруйалаах эбит! Оттон суруллубут суоруллубат дииллэринии, Полина Победа хоһоонун Тарас Лукич Тарасов-Тускул ыам ыйын 14 күнүгэр бэлиэтиир үбүлүөйдээх 70 сааһын көрсө үөрэ-көтө кини эрэллээх доҕоро — «Саха сирэ» хаһыат саайта бастакынан бэчээттиир буоллаҕа!
ТУСКУЛ
/Т.Л.Тарасовка 70 сааһынан/
Күннээх-халлаан буоларын,
Ардах-силлиэ түһэрин
Кэтиир өрүү ТУСКУЛБУТ
Тиэрдэр дьоҥҥо-сэргэҕэ.
Убаммыппыт оччо дуу?
Эрэнэрбит оннук дуу?
Эпиир диэнтэн сүттэ да,
Туоһулаһа түһэбит.
Мөхпүт, сиилиир түгэни
Тута умна охсобут,
ТУСКУЛ эрэ сэрэттэр
Дьиэттэн тахсыах курдукпут.
Кубулҕаттаах кулун тутар
Буолар эбээт халлааммыт —
Этии хоту ардаабат!
Санаа хоту хаардаабат!
ТУСКУЛ бүтүн халлааны
Салайыахтыы саныыбыт,
Ону баара ТУСКУЛБУТ
Нэһилиэги салайар!
Өрүү үлэ үөһүгэр
Эдэриттэн биллибит,
Араадьыйа эйгэҕэ
Элбэх сыла аастаҕа!
Күннүүн-дьыллыын алтыһан
Сэттэ уонун туоллаҕа!
Санаа онтон түспэтин!
Хаһаас сыллар элбэхтэр!
Күнү-ыйы кэтээҥҥин
Сэргэх олох салҕаннын!
«ТУСКУЛ» диэнтэн норуотуҥ
Саҕаланнын хас күнэ!
ПОЛИНА ПОБЕДА.
11.05.2026