Индигиир өрүскэ, Өймөкөөн оройуонун сиригэр түспүт сөҥүү түмүгэр ардахтан үөскээбит халаан салҕанар, уу таһыма сууккаҕа 15-20 см үрдүүр диэн Саха сиринээҕи күнү-дьылы кэтээн көрөр сулууспа иһитиннэрэр.
Бэс ыйын 11 күнүнээҕи туругунан, Индигиир өрүскэ Өймөкөөн сэлиэнньэтин анныгар уу таһыма гидропост нуул бэлиэтиттэн 401 см тиийдэ (хонууга тахсыы бэлиэтэ – 450 см). Чугастааҕы үс сууккаҕа уу таһыма 430-450 см диэри үрдүүрэ күүтүллэр.
Күүстээх уонна уһуннук түспүт ардахтар кэннилэриттэн сэлиэнньэни уу ылыан сөп (уу таһыма 480 см таҕыстаҕына уу ылыан сөп).
Гидрометеорологическай быһыы-майгы уларыйыытын учуоттаан, сабаҕалааһын күн аайы тахсар анал гидрологическай бюллетеннэринэн уонна шторм сэрэтиилэринэн чуолкайданыа.