Ил Дархан Айсен Николаев бүгүҥҥү «Быһа лииньийэ» кэмигэр үүтү туттарыы иһин субсидия төлөбүрүгэр хойутааһын тахсыбытын бэлиэтээтэ. Кини Нам улууһун олохтооҕо кыһалҕатын этимммитин кэннэ тустаах министиэристибэлэргэ бу балаһыанньаны быһаарарга сорудахтаата.
Ил Дархан этэринэн, үүккэ субсидияны үбүлээһин билиҥҥи кэмҥэ 65% ылар. Кини бэлиэтээбитинэн, быйылгы сылга үүтү бэлэмнээһин ааспыт сыллааҕар лаппа үрдүк, былааны 5 тыһыынчаттан тахса туоннанан куоһарар. Ол эрээри 3 ый хойутааһын бу улахан кыһалҕанан буолар. Айсен Николаев Тыа хаһаайыстыбатын министиэристибэтигэр уонна Үп министиэрситибэтигэр Нам улууһугар тахсыбыт балаһыанньаны сиһилии быһаарарга сорудахтаата, бары төлөбүрдэр толоруллуохтарын бигэргэттэ.
«Бу боппуруоска дьоһуннаахтык сыһыаннаһар улуустар үчүгэй түмүктэри көрдөрөллөр. Холобур, Мэҥэ Хаҥалас улууһа сыллааҕы былаанын толорон эрэр, бу ситиһиилээх үлэ холобура буолар», – диэн кини бэлиэтээтэ. Ил Дархан ону таһынан тыа хаһаайыстыбатын өйөөһүн боломуочуйаларын олохтоох бэйэни салайыныы таһымыгар биэрии сөптөөх быһаарыы буолбутун уонна олохтоох былаастар бары былааннаммыт үбү ылыахтаахтарын тоһоҕолоото.
2025 сылга Саха сиригэр үүтү бэлэмнээһини өйүүргэ 4,309 миллиард солкуобай субвенция көрүллүбүт. Бүгүҥҥү күҥҥэ 2,786 миллиард солкуобай 20 муниципалитет икки ардыгар үллэһиллибит, бу уопсай үбүлээһин 65% ылар. Бу үбүлээһин тыа хаһаайыстыбатын үлэһиттэригэр тиэрдиллибит.
Балаҕан ыйын 26 күнүнээҕи туругунан, өрөспүүбүлүкэҕэ 54287 туонна үүт бэлэмнэниллибит, бу сыллааҕы 62859,9 туонна сорук 86,4 бырыһыаныгар тэҥнэһэр, ааспыт сылга бу кэмҥэ 48800 туонна бэлэмнэммитэ.
Бу нэдиэлэҕэ муниципальнай тэриллиилэр ортолоругар сыллааҕы былааны толорууга саамай үчүгэй көрдөрүүлээхтэ: Мэҥэ Хаҥалас улууһа (102,8%), Чурапчы (92,9%), Амма (92,4%), Сунтаар (92,4%), Горнай (90,2%), Кэбээйи (88,9%), Өлүөхүмэ (88%), Томпо (87,9%), Бүлүү (87,9%) уонна Хаҥалас (84,5%).