Томпо улууһун Байаҕантай нэһилиэгин орто оскуолатыгар волонтердар этэрээттэрэ үлэлиир. Манна төрөөбүт дойдуларын таптыыр эдэр патриоттар түмсүбүттэр, диэн Томпо улууһун дьаһалтатын пресс-сулууспата иһитиннэрэр.
Оҕолор биир дойдулаахтарыгар, байыастарга, анаан истиҥ бэлэхтэрин бэлэмнээбиттэр. Ону тириэрдэргэ 8-с кылаас үөрэнээччитэ Камила Слепцова улуус киинигэр, Хаандыгаҕа кэлэн, улуус баһылыгын бастакы солбуйааччыта Степан Кривошапкиҥҥа оҕолор оҥорбут харысхалларын туттарда. Бу — ыраастаныыга, араҥаччыланыыга, эйэҕэ уонна күүскэ аналлаах чүмэчилэр уонна үөрэ ото.
Былыр-былыргыттан билиҥҥээҥҥэ диэри, үөрэ ото саха дьонун ас оҥостон аһыыр, олус сөбүлүүр отторунан буолар. Ол курдук, улаханнык ыалдьан мөлтөөбүт дьон, бу отунан уһуннук эмтэннэҕинэ, үөрэни ас оҥостон иһэ сырыттаҕына, үтүөрүөн сөп. Ордук киһи утуйарыгар, уоскуйарыгар, аһы буһарар уорган үлэтэ тупсарыгар, сэниэ киллэринэргэ, чэбдигирэргэ туһалаах.
Сотору кэминэн харысхаллар улуус салалтата уонна олохтоохторо хомуйбут гуманитарнай көмөлөрүн кытта биир дойдулаахтарыгар ыытыллыахтара. Степан Александрович улуус баһылыга Яков Степанов аатыттан уонна тус бэйэтин аатыттан үөрэнээччилэргэ Кыайыы туһугар оҥорор үтүө дьыалаларын иһин махтанна.