Аныгы үйэҕэ сахабыт кыргыттара олох араас эйгэтигэр ааттарын ааттаталлар, саха сатаабата суоҕун итэҕэтэллэр. Ол быыһыгар таһынан таһымнаабыт талааннарынан эбэтэр, төттөрүтүн, киһи кыайан өйдөөбөт кэмэлдьилэринэн сөхтөрөллөр. Ону барытын социальнай ситимнэргэ бар дьон көрүүтүгэр таһаараллар, сорохтор лайк хомуйар туһугар ууга-уокка да түһэллэрин кэрэйбэт курдуктар.
Биир билэр кэрэ аҥаарым бу тиэмэҕэ санаатын маннык үллэстэн турар: “Мин бэйэбин дьоллоох киһинэн ааҕынабын. Тоҕо диэтэххэ, тыа сирин олоҕун эппинэн-хааммынан билэн улааппытым, “Дьоллоох Дьокуускай” диир куораккытыгар үөрэнэр эрэ кэммэр олорон ааспытым. Үөрэхпин бүтэрээт да, тыам сиригэр куоппутум, үлэ үөһүгэр оройбунан түспүтүм. Таптыыр киһибэр кэргэн тахсан, оҕо-уруу төрөтөн, ыал тэҥинэн олорон кэллибит. Ол саҕана ким да кимтэн да улаханнык чорбойо сатаабат, бары биир баайыылаах дьон этибит. Олох хас биирдии күнүттэн, үлэбит түмүгүттэн үөрэрбит, биир тылынан эттэххэ, сарсыҥҥылаах дьон этибит. Оттон билигин хайдаҕый? Кырдьыгынан этэбин: мин билигин сиэннэрим улаатан, киин сирдэргэ бардахтарына, бу дьалхааннаах олоххо бэйэлэрин хайдах булунуохтарай диэн олус долгуйабын. Ол төрүөтэ судургу — ити араас социальнай ситимҥэ кыргыттар-дьахталлар бэйэлэрин кырасыабай олохторун, дьэрэкээн дьиэлэрин-уоттарын сиэри таһынан эрэкэлээмэлииллэриттэн, уопсастыбаҕа сыһыаннарыттан уо. д.а. дьааххана саныыбын. Тоҕо диэтэххэ, олоҕун суолугар саҥа үктэнэн эрэр эдэр киһи “олох диэн барыта маннык чаҕылхай, баай-талым буолуохтаах” диэн сыыһа санааҕа кэлиэн сөп. Ол иһин, ити социальнай ситимнэргэ көрөр олоҕор ымсыыран, түргэнник харчыланар, байар-тайар туһугар көрүнньэҥ олоҕу батыһыа диэн куттана саныыбын”.
Бу ийэ киһи куттанара, чугас дьонун киэҥ сирдэргэ ыытыан баҕарбата сороҕор оруннаах да курдук.
Салгыытын «Саха сирэ» хаһыат бүтэһик нүөмэригэр ааҕыҥ.