Бүгүн Дьокуускайга «Мас уустарын тойуга» өрөспүүбүлүкэтээҕи 3-с бэстибээл-куонкурус саҕаланна.
Икки күн устата ыытыллар суолталаах тэрээһин Саха сиригэр Култуура сылыгар уонна РФ култууратын үтүөлээх үлэһитэ, СӨ архитектордарын сойууһун чилиэнэ, Былатыан Ойуунускай аатынан бириэмийэ лауреата, айар педагогика академиятын академига, норуот маастара Эрнест Алексеев төрөөбүтэ 80 сылын чэрчитинэн ыытыллар.
— Бүгүҥҥү тэрээһиҥҥэ 24 чороон, 19 кырыымпа, 6 ох саа оҥорор маастар кыттан, хас биирдиилэрэ бэйэлэрин хайысхаларынан үлэлээтилэр. Сарсын 17 чааска кырыымпаһыттар оҥорбут кырыымпаларынан дьон иннигэр төбүрүөннээн олорон оонньуохтара. Оттон чороон оҥорооччулар бэйэлэрин иһиттэригэр быырпах уонна кымыс кутан, айах тутуохтара. Чороон оҥорооччуларга эрдэттэн сорудах бэриллибитэ. Онон кинилэр бэлэм оҥоһуктарын манна кэлэн ойуулаатылар, сарсын хатырык уутунан кырааскалыахтара, ынах арыытынан арыылыахтара. Онон ким баҕалаах кэлэн, бу маны барытын кэлэн илэ көрүөхтэрин, маастардар үлэлэрин кэтээн көрүөхтэрин сөп, — диэн санаатын үллэһиннэ норуот маастара, “Чороон” норуот оҥоһугун сайыннарыы уонна үйэтитии киинин дириэктэрэ Афанасий Лопатин.
Кырыымпа оҥорооччулар ортолоругар «Саха сирэ» хаһыат «Сатабыл» рубрикатын дьоруойа, Нам улууһун Хатырыгыттан төрүттээх эдэр удьуор уус Виталий Слепцов баар. Кини түөрт гыммыт биир сибиэһэй сыалыһар тириититтэн кырыымпа оҥоро олороро. Үөрүйэх буолан, туттара-хаптара түргэнэ, бэйэтин дьыалатын баһылаабыт уус буолара харахха быраҕыллар. Чахчы бастыҥ үлэ ахсааныгар киирэр кырыымпа оҥоһуллан тахсан эрэр!
Тэрээһин кыттыылаахтара — норуот уустара уонна норуот уус-уран оҥоһуктарын исписэлиистэрэ.
Маны таһынан, куонкуруска быйыл бэйэлэрин баҕа өттүнэн кыттар дьон элбэх.
«Үһүс төгүлүн мас оҥоһук күөн күрэһэр ыччаттар хото кытталлар. Ол курдук, быйылгы «Мас уустарын тойугар» орто анал үөрэх уонна тиэхиньиичэскэй оскуола устудьуоннара кыттыыны ыллылар. Бу — мас ууһун идэтин ыччат дьон кэрэхсиирин туоһута”, — диэн бэлиэтээтэ тэрээһин арыллыытыгар СӨ бырабыыталыстыбатын бэрэссэдээтэлин солбуйааччы Сергей Местников.
Өбүгэ саҕаттан кэлбит мас оҥоһугу оҥорор үөрүйэҕи сайыннарар уонна үйэтитэр соруктаах тэрээһини (Ил Түмэн) бэрэссэдээтэлин бастакы солбуйааччы Александр Жирков уонна СӨ норуотун маастара Афанасий Лопатин көҕүлээн ыыталлар.