Бүгүн социальнай ситиминэн айылҕа ураты көстүүтүн – үөр бырдах хаарга сытарын уһулбуттара тарҕаммыта. Исписэлиис этэринэн, үөн-көйүүр халлаан эмискэ сылыйыытыттан тиллибит. Бу туһунан ЯСИА иһитиннэрэр.
Кулун тутар 17 күнүгэр сарсыарда Дьокуускай куорат олохтооҕо куорат пааркатыгар дьаарбайа сылдьан, сүүһүнэн бырдах хаарга сытарын көрбүт уонна видеоҕа устубут.
ЯСИА-ҕа эспиэр быһаарбытынан, урут киин куоракка кулун тутар ортотугар маннык түбэлтэ бэлиэтэммэтэх, ону тэҥэ ураты көстүү төрүөтүн быһаарбыт. Дэҥҥэ көстөр айылҕа дьиктитин сарсыарда куорат пааркатын устун дьаарбайа сылдьыбыт Арсений Колодезников көрбүт. Кини хаарга сытар үөнү-көйүүрү бастаан былырыыҥҥы сэбирдэхтэр дии санаабыт.
«Ол гынан баран, болҕойон көрөн баран, элбэх бырдах буоларын өйдөөбүтүм. Бырдахтар тиллэн баран, эмискэ өлөн хаалбыт курдуктар. Видеону бүгүн сарсыарда сэттэ чаас саҕана уһулбутум», — диэн кэпсиир Арсений Колодезников.
«Технопарк Якутии» биотехнология лабораториятын сүрүннүүр экспертэ Евгений Попов быһаарбытынан, Саха сиригэр кулун тутар кыһыҥҥы ыйынан ааҕыллар, бырдахтар көтүүлэрэ халлаан температура үрдээһинин кытары сибээстээх.
«Бырдахтар нуулга чугаһыыр эбэтэр үрдүк температураҕа уу тахсар кэмигэр тиллэллэр. Бука, кумаар ыамата кылгас сылыйыы кэмигэр хаар ууллубут сиригэр улаатаннар көппүттэрэ буолуо. Ол гынан баран, ити кэнниттэн тымныйыы буолбутугар кинилэр өлбүттэр быһыылаах. Үөннэр минус 4 кыраадыска өлөллөр», — диэн Евгений Попов кэпсээтэ. Эспиэр кулун тутар ортотугар маннык айылҕа дьикти көстүүтүн аан бастаан көрөрүн бэлиэтээтэ.