Нерюнгри улууһугар Киин балыыһаҕа дьахтар консультациятын, «Б» блогу саҥардыы, «А» эмтиир блогу уонна «В» блогу олохтоохтук өрөмүөннээһин үлэлэрэ түмүктэннилэр.
Нерюнгри улууһун Киин балыыһатын саҥардыы Соҕуруу Саха сирин 50 тыһыынчаттан тахса олохтооҕор оҥоһуллар мэдиссиинэ көмөтүн хаачыстыбатын үрдэттэ. Эбийиэктэри олохтоохтук өрөмүөннээһин Арассыыйа бэрэсидьиэнэ Владимир Путин бигэргэппит Нерюнгри куорат маастар-былаанын чэрчитинэн ыытылынна.
«Кэнники сылларга доруобуйа харыстабылын эбийиэктэригэр болҕомто уурулларыттан олус үөрэбит. Дьиэлэрбит олус кыраһыабай, табыгастаах буоллулар. Ол, биллэн турар, Соҕуруу Саха сирин олохтоохторугар мэдиссиинэ көмөтө табыгастаах уонна хаачыстыбалаах буоларыгар көмөлөстө. Улахан махтал», -– диэн Нерюнгри улууһун олохтооҕо Ирина Гощанская үөрүүтүн үллэһиннэ.
«Уһун уонна көхтөөх олох» национальнай бырагыраама көмөтүнэн, балыыһа комплексын куорпустарын мэдиссиинэ аныгы тэриллэринэн уонна миэбэлинэн хааччыйдылар, эмтиир уонна ыарыыны быһаарар көмө хайыы үйэ оҥоһуллар.
Билигин саҥардыы үлэтэ өссө биэс куорпуска ыытыллар (тирии-венерология диспансерыгар, улахан дьон поликлиникатыгар уонна суһал көмө отделениетыгар).
Өрөспүүлүкэҕэ доруобуйа харыстабылын сайыннарыы «Биир ныгыл Арассыыйа» баартыйа норуодунай бырагырааматыттан биир дьоһуннаахтарынан буолар. Онуоха ураты болҕомто «Здоровоье будущее» баартыйа бырайыагын чэрчитинэн ууруллар. СӨ Ил Дарханын уонна бырабыыталыстыбатын пресс-сулууспата