Саха сирин киин куоратыгар суолу тутуу сезонугар бэлэмнэнии түһүмэҕэ саҕаланна. Арассыыйа Бэрэсидьиэнэ Владимир Путин көҕүлээбит «Олох инфраструктурата» диэн саҥа национальнай бырайыак чэрчитинэн Дьокуускайга уонна куорат таһынааҕы улуустарга уулусса – суол ситимин 13 эбийиэгэ саҥардыллыаҕа. Сүрүн үлэлэр куорат хас да улахан уулуссаларыгар ыытыллыахтара диэн СӨ Тырааныыспарга министиэристибэтэ иһитиннэрэр.
Чуолаан, Ефимов уулуссатыгар саҥа аспаал бүрүөһүнүн ууруу былааннанар. «Главстрой» МКУ-га иһитиннэрбиттэринэн, билиҥҥитэ бэдэрээттэһэр тэрилтэ бэлэмнэнии түһүмэҕэр киирдэ – инертнэй матырыйааллары аҕалыы бара турар. Күн-дьыл туруга үчүгэй буолла даҕаны, тута аспаалы уурууну саҕалыахтара. Сүрүн үлэлэр кулун тутар бүтүүтүгэр эбэтэр муус устар саҥатыгар саҕаланаллара күүтүллэр.
Ефимов уулуссатын таһынан суол үлэһиттэрэ чугастааҕы күннэргэ Хабаров уулуссатыгар үлэлэрин сөргүтүөхтэрэ. Ону таһынан өрөмүөн былааныгар Богдан Чижик уулуссата киирбит. Саҥардыы үлэтэ бүппүтүн кэннэ, бу уулуссалар Дьокуускай куорат соҕуруу уонна хотугу өттүлэрин ситимниир биир тыраассаҕа холбонуохтара.
Быйылгы сезоҥҥа Сэбиэскэй Аармыйа 50 сыла уулуссатыгар саҥардыы үлэтэ салҕанан барыаҕа. Манна суолу-ииһи кэҥэтии былааннанар – түөрт балаһалаах буолуохтаах, ол ноҕоруусканы намтатыахтаах.
Куорат дьаһалтатыгар таһаҕас тиэйэр магистралларга үлэни ыытыынан сибээстээн уулусса сорох балаһатын быстах кэмҥэ сабыахтарын сөп диэн сэрэтэллэр. Массыыналаахтар уонна сатыы дьон сылдьалларыгар сырыыны түһүмэхтээн сабар былааннаахтар.