Бүгүн Дьокуускайга Бүтүн Арассыыйатааҕы “Сыл учуутала-2026” күөн күрэс муниципальнай түһүмэҕэ түмүктэнэр тэрээһинэ буолан ааста. Быйыл күөн күрэскэ куорат 31 оскуолатыттан 32 педагог кытынна.
Кыттааччылар хас да күн устата идэлэригэр маастарыстыбаларын көрдөрдүлэр, аһаҕас уруоктары, маастар-кылаастары ыыттылар уонна тургутуулары аастылар.
“Дьокуускай куорат” куораттааҕы уокурукка муҥутуур кыайыылаах аатын куорат баһылыгын солбуйааччы Владимир Аржаков биллэрдэ. “Сыл учуутала-2026” күөн күрэс муниципальнай түһүмэҕин муҥутуур кыайыылааҕынан уонна “Сырдатааччы-учуутал” анал ааты Саха-кэриэй оскуолатын устуоруйаҕа, обществознаниеҕа учуутала Александр Михайлович Абрахов ылла!
Күөн күрэскэ миэстэлэспиттэр:
«Лидер-учуутал» — Федотова Эмма Иннокентьевна, Дьокуускай куорат 8-с нүөмэрдээх классическай гимназиятын алын кылааһын учуутала;
«Маастар-учуутал» — Тимофеев Айсен Петрович, Н.И.Шарин аатынан Дьокуускай куорат 39-с нүөмэрдээх оскуолатын физикаҕа учуутала;
«Билим лидерэ учуутал» — Попова Саргылана Николаевна, Дьокуускай куорат лиссиэйин физикаҕа учуутала;
«Новатор-учуутал» — Протопопов Андриан Гаврильевич, А.Г. уонна Н.К. Чиряевтар ааттарынан Дьокуускай куораттааҕы национальнай гимназия биологияҕа, химияҕа учуутала;
«Наставник-учуутал» — Габышева Саргылана Владимировна, С.И.Климаков аатынан 24-с нүөмэрдээх оскуола устуоруйаҕа, обществознаниеҕа учуутала;
«Профессионал-учуутал» — Янишевская Батчимэг Батыровна, М.И. Кершенгольц аатынан 9-с нүөмэрдээх оскуола аангылыйа тылын учуутала.
Бу туһунан Дьокуускай куорат үөрэҕин управлениетын МАХ ханаалыгар суруйаллар.
