Ньурба улууһун Далбар хотуттара аан дойду таһымнаах күрэххэ дьоҕурдарын, талааннарын көрдөрөн, үрдүк ситиһиилэннилэр. Бу туһунан Ньурба улууһун дьаһалтатын пресс-сулууспата иһитиннэрдэ.
Кулун тутар 29 күнүгэр Кытай киин куоратыгар — Пекиҥҥэ — ыытыллыбыт XI аан дойдутааҕы «Хрустальный лотос» бэстибээлгэ Н.И. Харитонов – Николай Чуор аатынан «Кыталык» култуура киинин иһинэн үлэлиир «Далбар Хотун» иис-уус кулуубун бөлөҕө ситиһиилээхтик кытынна.
Маастардар «Саха мааны таҥаһа» диэн нүөмэринэн, аан дойдутааҕы таһымнаах дьүүллүүр сүбэ биһирэбилин ылан, I истиэпэннээх лауреат үрдүк аатын сүктүлэр.
«Бөлөх салайааччыларын Нюргустана Иннокентьевна Яковлеваны, Фекла Ивановна Иванованы, постановщик-хореограф Варвара Георгиевна Плотникованы уонна күндү кыттааччыларбытын — бары «Далбар хотуттары» — Ньурба улууһун дьаһалтата итии-истиҥ эҕэрдэтин тиэрдэр!» — диэн Ньурба улууһун дьаһалтатын пресс-сулууспата иһитиннэрдэ.