Сергей уонна Марфа Расторгуевтар ааттарынан Саха цииркэтэ бэрт дириҥ ис хоһоонноох, баай архыыптаах тэрилтэнэн биллэр.
Бу туһунан бүгүн Архыып үлэһиттэрин бастакы пуорумугар кыттыыны ыла сылдьар тэрилтэ архыыбын үлэһиттэрэ Ксения Дедюкина уонна Туйаара Третьякова маннык кэпсээтилэр:
— Биһиги архыыппыт цииркэ төрүттэниэҕиттэн бары докумуоннары сыа-сым курдук тутан, наардаан уура сылдьар. Былырыын өрөспүүбүлүкэ архивистара цииркэ архыыбын анаан кэлэн үөрэппиттэрэ уонна уопут атастаспыттара. Цииркэ артыыстарын көстүүмнэрин үйэтитэр сыалтан биһиги докумуонунан архыып оҥорбуппут. Ол курдук хас биирдии көстүүм архыыпка киирэн иһэр. Туох матырыйаалтан оҥоһуллубуттара, көстүүмҥэ төһө миэтэрэ таҥас туттуллубута — симиэтэтигэр тиийэ тиһэбит. Биһиэхэ, тылбаастабакка эттэххэ, «художественно- постановочнай» диэн бөлөх баар. Онно кылаабынай режиссер, иистэнэр сыах сэбиэдиссэйэ эскиис уруһуйдаан, Уус-уран сэбиэккэ бигэргэтэллэр. Култуура тэрилтэтин быһыытынан министиэристибэбит биһигини тоҕо архивистарга холобурдаабытай диир буоллахха, көстүүм барыта докумуоҥҥа тиһиллэн, анал архыыпка киллэриллибит уопутун анаан атастаһыннарбыта. Онон бу уопуппут култуура бары тэрилтэлэригэр туһалыыра чахчы диэн эрэнэбит, — диэн санааларын үллэһиннилэр цииркэ архивистара.
Ити курдук, бэйэлэрин уопуттарын атастаһар тэрилтэлэр архыыптарын бүгүҥҥү пуорум кыттааччылара бэркэ сэргии көрдүлэр-иһиттилэр.