Горнай улууһун борокуратуурата бэрэбиэркэ ыытар кэмигэр, «Одуну нэһилиэгэ» муниципальнай тэриллиитин «Маҕарастааҕы сынньалаҥ киинэ» муниципальнай бүддьүөт тэрилтэтигэр урут судаарыстыбаннай сулууспаҕа үлэлээбит киһи үлэҕэ ылыллыбытын быһаарда.
Сокуон ирдэбилин кэһэн, үлэ биэрээччи бу үлэһити кытта үлэ дуогабарын түһэрсибитин туһунан биллэриини кини урукку үлэлээбит сиригэр, сокуонунан туруоруллубут болдьох иһигэр ыыппатах.
Манан сибээстээн, борокуратуура уурааҕынан тэрилтэ салайааччыта РФ Административнай быраабы кэһии кодексатын (КоАП РФ) 19.29 ыстатыйатынан административнай эппиэтинэскэ тардылынна. Сокуону кэспит салайааччы 20 000 солкуобай суумаҕа ыстарааптанна.