Билигин хас биирдии эрэстэрээн менютугар облепихалаах чэй баар буолар. Саха сирин олохтоохторо биһирээн сакаастыыллар. Бу чэйи дьиэҕэ бэрт судургутук оҥостуохха сөп.
Элбэх оҕолоох ыал эрэстэрээҥҥэ бардаҕына, аһылыгы аахсыбакка туран аҥардас утахха, чэйгэ даҕаны ботуччу харчыны хаалларан тахсар. Облепихалаах чэйи дьиэҕэ бэрт судургутук маннык оҥостуохха сөп.
Туох ирдэнэр:
Облепиха – 150-200 кыраам
Апельсин – 1 улахан
Саахар – ким төһө минньигэһи сөбүлүүрүнэн
Мята – сөбүлүүр дьон кыратык эбиэн сөп.
Хайдах бэлэмниибит:
Облепиханы ыстакааҥҥа кутабыт, үрдүгэр сабар-саппат итии уунан саба кутабыт уонна тута улахан ньуосканан ныһыйабыт. Облепиха бэйэтэ сымнаҕас буолан бэрт түргэнник илдьирийэр.
Апельсины кичэйэн сууйан баран кыра гына түөрт муннуктуу кырбыыбыт.
Ныһыллыбыт облепиханы, кырбастаммыт апельсины Тапервер муорус бэлэмниир иһитигэр кутабыт (суох түгэнигэр ханнык баҕарар хаппахтаах чанньык барсар), саахар, толору итии уу эбэбит уонна булкуйан баран хаппахтаан уонча мүнүүтэ туруора түһэбит. Бүттэ. Эрэстэрээн чэйэ бэлэм.