Суотту нэһилиэгин модельнай бибилэтиэкэтигэр «Библионочь» 15-с төгүлүн буолар Бүтүн Арассыыйатааҕы аахсыйа иитинэн «Дойдуларга, куораттарга…» тэрээһин ыытылынна.
Манна эгэлгэ араас дойдуларга, куораттарга сылдьан элбэҕи билбит-көрбүт уонна араас дойдулар малларын кэллиэксийэлиир умсулҕаннаах дьарыктаах дьоммут кэлэн, кыттан, кэпсээн-ипсээн олус кэрэхсэбиллээх тэрээһин буолла.
Сэбиэскэй Сойуус уонна аан дойду 37 куоратыгар сылдьыбыт Мигалкин Г.Г., аан дойду араас муннуктарыттан кэлбит ложкалары мунньар Пак Т.В., бу аҕыйах хонуктааҕыта Кытайынан, Кореянан айаннаан кэлбит Копырина М.А., Италияҕа, Кавказка сылдьыбыт Иванова Е.И., Илиҥҥи дойдулары көрөн-истэн историяларын, култуураларын ыкса билбит Гоголева Е.Н., төрөөбүт дойдутун Өймөкөөн айылҕатын билиһиннэрбит Охлопкова Р.Е. кэпсииллэрин кэрэхсээн иһиттибит, ыйытыктарбытыгар хоруйдары ыллыбыт, кэпсэммит дойдуларга, куораттарга сылдьыбыт саҕа сананныбыт.
Бү түмсүүбүт дьиҥнээх арыйыытынан Зинаида Портнягина быыстапката буолла. Кини араас дойдулар уонна сэбиэскэй саҕанааҕы сэдэх кэллиэксийэтэ олус дириҥ историялааҕа, киэҥ кэпсээннээҕэ сөхтөрдө. Мустубут дьон болҕомтотун тарта.
Кинигэ быыстапката, хаартыскалар, быыстапкалар, Копырина М.А. кус куорсунуттан оҥорбут симэхтэрэ, киэргэллэрэ көрөөччү болҕомтотун тартылар.
Үтүө киэһэбитигэр уран тарбахтаах дьоммут маастар-кылаастарыгар үөрэннибит. Саввинова Г.В. ситии быаҕа сахалыы ыаҕайалары оҥорорго үөрэттэ. СӨ норуотун маастара Иванова Е.И.- Чыычаах кыыһын кытта сакура сибэккини оҥорорго үөрэннибит.
Киэһэбит олус туһалаахтык, кэрэхсэбиллээхтик ааһан элбэҕи билэн, сатабылга үөрэнэн тарҕастыбыт.
Раиса Черкашина
Хаартыскалар Раиса Черкашина тиксэриилэрэ