Киинэ Арассыыйаҕа уонна Беларусь Өрөспүүбүлүкэтигэр 1647 былаһааккаҕа таҕыста. Саха сиригэр киинэни Дьокуускайга «Центральнай», «Синема», «Авиатор» киинэ тыйаатырдарга, ону таһынан Алдаҥҥа, Покровскайга, Томмокко көрүөххэ сөп.
Киинэҕэ Донецкайтан төрүттээх эдэр киһи ийэтин блокадаланан турар Мариупольтан быыһаары фроҥҥа доброволеһынан барарын туһунан кэпсэнэр. Сүрүн герой уустук суолу туораан, дьиҥнээх байыас буолар.
Киинэни Андрей Симонов режиссердаабыт, кини дойдуга аан бастакынан байыаннай дьайыы туһунан «20/22» уус-уран киинэни устан турар. Онно сүрүн оруолу эдэр актер Глеб Калюжнай оонньообута, кини уһуллаат да тута Арассыыйа аармыйатыгар сулууспалыы барбыта.
Глеб Калюжнай уобараһа олоххо баар киһиэхэ — ДНР биир саамай эдэр ополченеһа Павел Чертокка олоҕурбут. Кини 18 сааһыгар фроҥҥа баран, «Малыш» диэн позывной ылбыт. Мотострелковай биригээдэ састаабыгар сылдьан, уонунан атаакаҕа уонна ыраастааһыннарга кыттыбыт, үс төгүл бааһырбыт.
Павел Черток 2024 сыллаахха “Меганом” айар индустрия академиятыгар #СВОёKИНО” бырагыраама кыттыылааҕа буолбут, бу бырагыраама сыалынан байыаннай дьайыыны дьиҥ харахтарынан көрбүт дьон кэпсээннэригэр олоҕуран, патриотическай документальнай уонна уус-уран медиаконтенты оҥоруу буолар.
Киинэни үксүн Мариупольга уонна Донецкайга устубуттар. Киинэни устууга байыаннай дьайыы кыттыылаахтара үлэлээбиттэр, диэн иһитиннэрэр Ил Дархан, бырабыыталыстыба пресс-сулууспата.