Биһиги бүгүҥҥү ыалдьыппыт — Үөһээ Бүлүү улууһун кэрэ куота, норуот айымньытын киинин талба талааннаах үлэһитэ, икки оҕо ийэтэ, талааннаах хореограф, үҥкүүгэ дууһатын, кутун туттарбыт Саргы Кардашевская.
Саргы, эйигин норуоттар икки ардыларынааҕы Үҥкүү күнүнэн истиҥник эҕэрдэлээн туран, улууспутугар үҥкүү улахан күрэхтэһиитэ ыытыллаары турар бириэмэтэ суох кэмҥэр кэпсэтэргэ сөбүлэспитиҥ иһин барҕа махталбын тиэрдэбин. Дьэ эрэ, кэпсэтиибитин саҕалыах.
— Саргы, эйигин ийэҥ Марина Иннокентьевна Кардашевская хас сааскыттан, хайдах үҥкүүгэ үөрэппитэй? Аан бастаан сыанаҕа хас сааскар тахсыбыккыный? Ханнык үҥкүүнү толобуккунуй?
— Урут телевизорга индийскэй киинэ куруук холбонон турар буолааччы. Ону көрөн ыллыы-ыллыы үҥкүүлүүллэрин үтүктэр, хамсаныыларбын бэйэм айар этим. Сыанаҕа 4 саастаахпар бэйэм туруорбут үҥкүүбүн толорбутум, онон бастакы үҥкүүбүнэн, атыннык эттэххэ, айымньыбынан, «Индийскэй үҥкүү» буолар. Онтон күндү ийэм Марина Иннокентьевна Кардашевская бу кыыс үҥкүүһүт буолууһу дии санаабыта эбитэ дуу, улааттаҕына үҥкүү учуутала буоллун диэн баҕа санаатын куруук этэрэ. Бэһис кылаас кэннэ Аксинья уонна Наталья Посельскайдар ааттарын сүгэр балетнай оскуолаҕа туттарса барбыппыт. Наталья Семеновна Посельская бэйэтэ тутан-хабан, көрөн-истэн баран: «Ылабыт», — диэбитин аҕам уонна эбэм кырата бэрт диэн ыыппатахттара. Ол кэннэ 7-с кылааска үөрэнэ сырыттахпына күн-күбэй ийэм барахсан ыарахан ыарыыга ылларан күн сириттэн туораабыта. Бу курдук, ийэм сырдык кэриэһин хайаан да толоруом диэн, бэйэм да баҕа санаам наһаа күүстээх этэ, Дьокуускай куоракка култуура коллеһыгар хореография отделениетыгар үөрэммитим.
— Таатта улууһуттан үҥкүүһүт быһыытынан тугу «илдьэ кэлбиккиний»? (стиль, олохтоох үгэстэри кытта билсии, чуолаан онно айыллыбыт ханнык эрэ нүөмэр?)
— Таатта улууһуттан туох да атын ураты стили илдьэ кэлбэтэҕим. Бэйэм тутуһар стильбынан, үҥкүүнү хайдах көрөрбүнэн үлэлээбитим. Манна дойдубар оннук үлэлии сылдьабын даҕаны.
— Саамай кылгас уонна бэһиэлэй ыйытыы. Эйиэхэ туох ордук уустугуй: уустук хамсаныыны үөрэтии эбэтэр икки оҕону түүн ортотугар диэри утутуу дуу?
— Холобура, үҥкүүлүү үөрэммит дьоҥҥо хамсаныыны үөрэтэрим ордук эрээри, этэ-сиинэ, илиилэрэ-атахтара хамсана, үҥкүүлүү үөрэммэтэх дьону үөрэтэр хаһан баҕарар уустук буолар. Онтон оҕону утутааһыны хаһан да ыарахан эбит диэн санаабатаҕым, утуйуохтаах оҕо син-биир утуйар.
— Икки кырачаан оҕо ийэтин аатын сүгүү уонна үҥкүүһүт буолан эт-хаан өттүнэн сайдар кэм икки ардыгар бириэмэни хантан булаҕыный?
— Өрөбүл күннэрбин эрдэттэн сөпкө былааннаан тутуһа сатыыбын. Сороҕор өрөбүл да күҥҥэ сатаммат буоллаҕына, киэһэ өттүгэр саамай элбэх бириэмэбин уонна улахан болҕомтобун оҕолорбор уурарга дьулуһабын.
— «Сөп буолуо, сылайдым, аны үҥкүүлээбэппин уонна оҕолорум эрэ туһугар олоруом» диэн бэйэҕэр этэр түгэн баара дуо? Ол кэннэ эйигин үҥкүүгэ тугу төннөрбүтүй?
— Бириэмэм тиийбэтиттэн, оҕолорбор ийэлэрин болҕомтото тиийбэт диэн санааттан итинник толкуй киирэн ылааччы. Ол эрэн үҥкүүтэ суох сатаммаппын билэбин, сыанам син-биир ыҥырар курдук.
— Эн үҥкүүгүнэн ордук ким киэн туттарый — кэргэниҥ дуу, үөрэппит ийэҥ дуу?
— Ордук аҕам Аскалон Иннокентьевич Кардашевскай киэн туттар. Мин кыыһым бу диэн үҥкүүлүүрбун олус астынар. Ийэм даҕаны үөһээттэн көрөн олуһун үөрэр дии саныыбын уонна чугас дьонум дириҥник сыаналыылларыттан испэр сахалыы сиэринэн сэмэйдик үөрэбин.
— «Миэхэ үҥкүү — бу…» диэн этиини бэйэҥ баҕараргынан түмүктээ.
— Миэхэ үҥкүү — олоҕум аргыһа.
— Саргы, истиҥ эппиэттэргэр ис сүрэхпиттэн махтанабын уонна айар үлэҕэр, тус олоххор айымньылаах сыһыаны, сырдык, сылаас күннэри эрэ баҕарабын! Үҥкүү күнүнэн!
Галина Васильева
Хаартыска Саргы Кардашевская тус архыыбыттан туһанылынна.