Икки күн устата өрөспүүбүлүкэтээҕи «Якутия — место встречи» бэстибээл 5 тыһыынчаттан тахса киһини түмтэ.
Пленарнай сиэссийэҕэ туроператордар, блогердар, сувенир оҥорооччулар, былаас уорганнарын уонна муниципалитеттар бэрэстэбиитэллэрэ туризмы уонна креативнай индустрияны сайыннарыы боппуруостарын ырытыстылар.
«Биһиги сүрүн сыалбыт — туризм эрэгийиэн экэниэмикэтин төһүү күүстээх салаатын быһыытынан туругун бөҕөргөтүү буолар. Бүгүн биһиги киэҥ боппуруостары — Саха сирин Федерация уонна дойдулар икки ардыларынааҕы таһымҥа иһитиннэрииттэн саҕалаан, салааны өйөөһүн мэхэниисимнэригэр диэри ырытыстыбыт. Биһиэхэ системнай өйөбүл мэхэниисимнэрэ: интеллектуальнай бас билиини харыстааһын, коммерческайа суох пуонда, сыл аайы граннар, инфраструктураны сайыннарыы бааллар. Туризмы сайыннарар биир төһүү күүһүнэн креативнай индустрия буолар. Холобур, биһиги киинэбит, видео оонньууларбыт, анимацияларбыт саҥа туристары сөхтөрүөхтэрин сөп. Сүрүннээн экосистемнай ньыма наада. Манна урбаан министиэристибэтэ эрэ буолбакка, тырааныспар, экэниэмикэ министиэристибэлэрэ, атын да министиэристибэлэр, муниципалитеттар уонна биисинэс да буолуохтарын сөп. Туристары кытта инвестициялар кэлэллэр. Ол иһин туризм биһиэхэ стратегическай соругунан буолар. Биһиги бары күүспүтүн холбоотохпутуна Саха сирэ Арассыыйа бастыҥ туристическай эрэгийиэннэрин ахсааныгар киириэ диэн эрэнэбин», — диэн СӨ Бырабыыталыстыбатын Бэрэсэдээтэлин солбуйааччы Анатолий Семенов эттэ.
Сиһилии: https://www.sakha.gov.ru/news/45806