Горнай улууһугар Атамай нэһилиэгэр байыаннай дьайыы кыттыылааҕа Александр Анатольевич Ларионовтыын истиҥ көрсүһүү буолан ааста.
Бибилэтиэкэ тэрийиитинэн ыытыллыбыт «Хорсун быһыы чааһа» тэрээһиҥэ биир дойдулаахпытын, байыаннай дьайыы кыттыылааҕын Александр Ларионовы кытта атах тэпсэн олорон сэһэргэһиигэ 10 кылаас үөрэнээччилэрэ, кылаас салайааччыта Акулина Ивановна Филиппова кыттыыны ыллылар.
Тэрээһин сүрүн сыала — үүнэр көлүөнэҕэ төрөөбүт дойдуга бэриниилээх буолууну иҥэрии, дьоруойдарбыт хорсун быһыыларын холобуругар оҕолору иитии. Биһиги сорукпут — аныгы кэм дьоруойдарын ааттарын үйэтитии уонна кинилэр хаартыскатын ыччакка көрдөрүү.
Көрсүһүү интервью халыыбынан барбыта олус табылынна. Александр бэйэтин олоҕун, сэрии толоонугар көрсүбүт ыарахаттарын уонна фронтовой доҕордоһуу туһунан кэпсээтэ.
—Бииргэ сылдьар табаарыстарыҥ эн эрэллээх эркиниҥ буолаллар, — диэн кини бэлиэтээтэ. Ону таһынан, буойун киһиэхэ тыылтан кэлэр көмө, оҕолор суруктара уонна дойду алгыһа төһөлөөх күүс-көмө буоларын туһунан эттэ.
Тэрээһин түмүгэр Александр Ларионов кэлэр көлүөнэҕэ бэйэтин баҕа санаатын тиэртэ: «Киһи хаһан да бэйэтин кыаҕар эрэниэхтээх, дойдутун таптыахтаах уонна ханнык да ыарахаттартан толлубат тулуурдаах буолуохтаах».
Биһиги нэһилиэк маннык хорсун буойуннаахпытынан киэн тутабыт. Тэрээһин кыттыылаахтара бары Александр Ларионовка эйэлээх халлааны, чэгиэн туругу уонна этэҥҥэ буолууну баҕардылар.
Елизавета Ефремова
Хаартыскаҕа Акулина Филиппова, Елизавета Ефремова түһэриилэрэ