Бүгүн эрэгийиэннээҕи ГТО киинэ адаптивнай физическэй култуураҕа уонна успуорка өрөспүүбүлүкэтээҕи киин (РЦАФКИС) үлэһиттэрин кытта кыттыһан, В. П. Решетников аатынан кырдьаҕастар уонна инбэлииттэр өрөспүүбүлүкэтээҕи интэринээт-дьиэлэрин олохтоохторугар истиҥ, доҕордуу көрсүһүүнү тэрийэн ыыттылар.
Тэрээһин туһунан тэрилтэ салайаачччыта Ариян Александров сырдатта:
— Көрсүһүү лиэксийэнэн саҕаланна. Кырдьаҕастар уонна доруобуйаларынан хааччахтаах дьон «ГТО бүтүн Арассыыйатааҕы комплекс устуоруйатын кытта билистилэр, билиҥҥитин уонна инники сайдыытын ирэ-хоро ырыттылар. Көрсүһүү бэлиэ түгэнинэн анал усулуобуйаҕа сөп түбэһиннэриллибит успуорт көрүҥнэрэ буоллулар. Кыттааччылар лазернай саанан бэргэнник ытыыны уонна корнхол оонньууну боруобалаатылар. Саалаҕа күрэхтэһии үөрүү-көтүү уонна күлүү-оонньуу аргыстаах барда.
Тэрээһин туһунан бэйэлэрин санааларын олохтоохтор маннык үллэһиннилэр.
«ГТО комплекса олус суолталаах, ордук биһиги эдэр көлүөнэбитигэр. Бу — нация доруобуйатын төрдө», — диэн санаатын үллэһиннэ 72 саастаах Мария Григорьева. «Успуорт туһунан бары көлүөнэ дьоҥҥо агитациялыыр улахан суолталаах. Киин үлэһиттэрэ биһиэхэ кэлэн, маннык бырааһынньык тэрийэн, санаабытын көтөхпүттэригэр ис сүрэхпититтэн махтанабыт!» — диэн эттэ 79 саастаах Татьяна Капустина. «Биһиги кэммитигэр бу комплекс «Үлэҕэ уонна көмүскэлгэ бэлэм буол» диэн ааттанара, мин ол саҕана нормативтары барытын кыһыл көмүс бэлиэҕэ туттарбытым», — диэн киэн тутта ахтан ааста 86 саастаах Егор Лаптев.
«ГТО — барытыгар!» диэн девиһинэн ааспыт көрсүһүү бары аахсыйалар успуорка уонна чөл олоххо саас хааччаҕа суоҕун өссө төгүл чаҕылхайдык дакаастаатылар.